Өлүөнэ мууһа Дьокуускай аннынан ыам ыйын 14-16 күннэригэр устуоҕун билгэлииллэр. Онон, өрүс муустан босхолонно даҕаны, ыам ыйын 20 – 25 күннэрин диэки Дьокуускай – Аллараа Бэстээх, Хаҥалас – Суотту, Мохсоҕоллоох – Хачыкаат хайысхаларынан паромнар сырыылара саҕаланыа.
Ааспыт нэдиэлэҕэ СӨ Тырааныспарын уонн суол хаһаайыстыбатын министиэристибэтигэр ыытыллыбыт сүбэ-мунньахха, «Дьокуускай» СХ паромунан устуу салаатын начаалынньыга Иван Анучин иһитиннэрбитинэн, Дьокуускай – Аллараа Бэстээх хайысхатынан быйыл 4 парому үлэлэтэр былааннаахтар эбит. Оттон Владимир Фролов салайааччылаах «АЯМ» хааччахтаммыт эппиэтинэстээх тэрилтэ быйылгы навигацияҕа 5 парому үлэлэтиэхтээхтэрин кэпсээтэ. «Быйыл өссө биир саҥа парому ыллыбыт. Навигация аһылынна даҕаны аҕалыахпыт», – диэн чопчулаан биэрдэ. Хаҥалас – Суотту хайысхатынан Петр Говоров тэрилтэтэ икки парому сырытыннарыахтаах. Суудуналар расписание быһыытынан сылдьыахтара. Оттон Мохсоҕоллоох – Хачыкаат учаастагар түөрт кыра паром, Томпо улууһугар икки паром үлэлиэхтэрэ.
Хаартыска: интэриниэттэн.
Анивера Акимова, edersaas.ru