Аны Үөһээ Бүлүү баһылыгын бастакы солбуйааччыта дьыалаҕа эрилиннэ

Ааптар: 
Бөлөххө киир:

Үөһээ Бүлүү улууһун баһылыгын бастакы солбуйааччы Андрей Неустроев Холуобунай кодекс 286 -с ыстатыйатын 3-с чааһын «в» пуунунан, ол аата “дуоһунаһын боломуочуйатын аһара баран улахан хоромньуну таһаарда”  диэн уорбаланан холуобунай дьыала тэрилиннэ. Силиэстийэ ыытыллар. Бу туһунан РФ  Силиэстийэлиир кэмитиэтин Саха сиринээҕи управлениета иһитиннэрэр. 

Александр Тарасов, «Саха сирэ» хаһыат, www.edersaas.ru

2014 сыллаахха  Үөһээ Бүлүү улууһун дьаһалтата уонна “Спланс” ХЭУо  хаарбах туруктаах дьиэттэн дьону көһөрүү бырагырааматын чэрчитинэн, дьиэни атыылаһыыга  64 мөл. солк. хантараак түһэрсибиттэр. Хантараак болдьоҕун олоххо киллэрии  2015 сыл ахсынньы 25 күнүгэр  диэри эбит. Бэдэрээтчит  элбэх кыбартыыралаах дьиэни болдьоҕор үлэҕэ киллэрбэтэх.

Үөһээ Бүлүү улууһун баһылыгын бастакы солбуйааччы Андрей Неустроев  2015 сыл кулун тутарыттан ахсынньыга  диэри  үлэ барыта толоруллубутун уонна көрүллүбүт үп  туһаныллыбытын  туһунан сымыйа докумуоҥҥа илии баттаабытын түмүгэр,  “Спланс” ХЭУо счетыгар 38 мөл. солк аһарыллыбыт. Бу боппуруоска олохтоох дьаһалта үлэһитин  санаатын ыйыталастыбыт.

Үөһээ Бүлүүтээҕи тутуу управлениетын начаалынньыга Александр Типанов :

— Хаарбах дьиэттэн дьону көһөрүү бырагырааматын чэрчитинэн, “Спланс” ХЭУо  Үөһээ Бүлүү сэлиэнньэтигэр  24 кыбартыыралаах үс мэндиэмэннээх таас дьиэ тутуутун ылсыбыта. Тутуу бытаарбыта.

Дириэктэр Арсентий Давыдов дьиэ тутуутугар кыһалҕа үөскээри гынна, онон көрүллүбүт үбү счеппар барытын аһардыҥ диэн көрдөспүт.  Тутуу матырыйаалын атыылаһан аҕалан, дьиэни болдьоҕор үлэҕэ киллэриэм диэн эрэннэрбит. Аны үбү кыайан туһамматахха, туттуллубатах аатыран бүддьүөккэ төннөрүллэр. Ол иһин тустаах сыалыгар-соругар үбү туһанар сыалтан итинник быһаарыы ылыныллыбыта. Билиҥҥи туругунан дьиэ көҥдөйө эрэ үмүрүтүллэн турар. Ол аата 28 мөл. солк эрэ туһаныллыбыт.

Манна даҕатан эттэххэ, соторутааҕыта ыаллыы сытар Ньурба улууһун баһылыгар Борис Поповка уонна бастакы солбуйааччы Иннокентий Васильевка Холуобунай кодекс эмиэ ити 286 -с ыстатыйатын 3-с чааһын «в» пуунунан, ол аата   “дуоһунаһын боломуочуйатын аһара баран улахан хоромньуну таһаардылар” диэн дьыала тэриллибитэ.

Александр Тарасов, «Саха сирэ» хаһыат, www.edersaas.ru

+1
0
+1
0
+1
0
+1
0
+1
0
+1
0
+1
0