Мантан саас өрөспүүбүлүкэ 9 улууһугар харыы тахсыан сөптөөх сирдэригэр мууһу кэбирэтэр үлэлэр ыытыллыахтаахтарын туһунан Уу ресурсаларын федеральнай агентствотын Өлүөнэ сүнньүнээҕи ууга управлениетын салайааччы Иннокентий Андросов иһитиннэрдэ.
Анивера Акимова, «Саха сирэ» хаһыат, https://edersaas.ru/
Былырыын 21 муниципальнай тэриллии 121 нэһилиэнньэлээх пууннара ууга барар кутталлаахтарын иһин, мууһу эрбээһин, хараардыы үлэтэ эрдэттэн ыытыллыбыта. Өлүөнэ мууһа этэҥҥэ ааһан, улахан кутталы үөскэппэтэҕэ. Онон бу да сырыыга, Таҥара сэрэҕи сөбүлүүр дииллэринии, Өлүөнэ уонна Халыма өрүстэргэ харыы үөскүөн сөптөөх сирдэринэн мууһу кэбирэтиллиэхтээх.
Бу нэдиэлэ саҥата ыытыллыбыт Уу ресурсаларын федеральнай агентствотын Өлүөнэ сүнньүнээҕи ууга управлениетын анал научнай-техническэй сэбиэтин сүбэ мунньаҕар халаантан көмүскэнэр, сэрэтэр үлэлэри ыытыы тула кэпсэтиигэ, таас чоҕунан уонна кумаҕынан уопсайа 475 гектар сири хараардыахтаахтарын уонна 58 км кэриҥэ мууһу эрбэтиэхтээхтэрин туһунан эттилэр. Ол иһигэр Өлүөнэҕэ 38 учаастакка, Халымаҕа 9 учаастакка үлэ ыытыллыахтаах.
Дьокуускай аннынан 47 га сир хараадыллыахтаах.
Мууһу кэбирэтии үлэлэрэ ыытыллыбыттара хаһыс да сылыгар барда. Бу быдан көдьүүстээҕэ биллэн, кэлиҥҥи сылларга өрүстэр улаханнык халааннаабакка, эйэ-дэмнээхтик ааһаллар.
Аҥардас Нам улууһун таһынан 28 км муус эрбэниэхтээх.
Сэбиэт сүбэ мунньаҕын кэмигэр Дьокуускайдааҕы гидрометкиин начальнига Александр Аржаков Дьааҥы уонна Халыма өрүстэригэр нуорматтан элбэх хаар түспүтүн бэлиэтээтэ. «Зырянка уонна Орто Халыма куоратын аннынан муус харыыта үөскүөн сөп. Алаһыай өрүскэ болҕомтону ууруохха наада. Манна хаар саппааһа төһө эмит элбэх. Бу өрүс халааннаатаҕына Орто Халыма уонна Аллараа Халыма нэһилиэктэрэ ууга барар кутталлаахтар», – диэтэ.
Чопчу билгэлээһин кулун тутар саҥата биллиэхтээх.
Анивера Акимова, «Саха сирэ» хаһыат, https://edersaas.ru/