Аны Ньурба улууһун баһылыгын бастакы солбуйааччытыгар дьыала тэрилиннэ
Бэҕэһээ, ахсынньы 27 күнүгэр, РФ Силиэстийэлиир кэмитиэтин Саха сиринээҕи управлениетын салайааччыта, генерал Олег Мезрин Ньурба улууһун баһылыга Борис Поповка холуобунай дьыала тэрийбитэ. РФ Холуобунай кодексатын 286-с ыст. 3-с чааһын «в» пуунунан, ол эбэтэр, ыарахан содулу аҕалан туран, дуоһунас боломуочуйатын аһара барыы бэлиэтэ баарынан. Аны оруобуна сити ыстатыйанан Ньурба улууһун дьаһалтатын баһылыгын бастакы солбуйааччы Иннокентий Васильевка дьыала тэрилиннэ. Ньурба борокуратуурата ыыппыт бэрэбиэркэтигэр олоҕуран.
Вера МАКАРОВА, «Саха сирэ», https://edersaas.ru/
Силиэстийэ сабаҕалыырынан, Иннокентий Васильев «Ньурба улууһа» муниципальнай тэриллии хаарбах туруктаах дьиэлэргэ олорор дьону көһөрөргө анаан застройщиктан дьиэ атыылаһарга түһэриллибит контрагынан, сокуоннайа суох докумуоннары таһаарбыт. Ол докумуоннарга олоҕуран, контракт усулуобуйатын толоро илик тутааччыга сокуоннайа суох төлөбүр оҥоһуллубут. Бүгүҥҥү күҥҥэ застройщик 15 мөл. солк. сууманан сыаналанар үлэтин саҕалыы да илик.
Оттон бэҕэһээ тутуллубут Борис Попов билигин улуустааҕы полиция дьону быстах кэмҥэ тутар изоляторыгар хаайыллыбыт. Киниэхэ силиэстийэ кэмигэр ханнык хааччахтыыр миэрэ туттулларын бүгүн суут быһаарыаҕа.
Вера МАКАРОВА, «Саха сирэ», https://edersaas.ru/