«Истибэт дьон кыһалҕатын үгүстэр өйдөөбөттөр. Арай, судаарыстыба истэр аппараатынан көмөлөһөн абырыыр эрээри, мөлтөх аппарааттары биэрэн, кыһалҕабыт өссө элбиир. edersaas.ru
2017 сыллаахха ИПР бырагырааманан олус күүстээх диэн аппараат анаабыттара да, онтум үлэлээбэккэ, сэтинньигэ диэри ытарҕа курдук кэтэ сылдьыбытым. Ыксаан, 2017 с. ахсынньы 15 күнүгэр ФСС-ка төттөрү биэрбитим. Онон, урукку мөлтөх аппарааппын кэтэн, түҥ-таҥ истэ сылдьабын.
Төлөпүөнү истибэппин, хата батсаап туһалыыр. Уочараппар күһүн батсааптаах төлөпүөнү биэрэллэрэ буоллар, туһалыах эбит. Ону истибэт буоламмын, дьонунан ыйыттарбыппын, кулун тутарга кэлиэ диэбиттэр. Онон, төнүннэрбит аппараатым оннугар хаһан биэрэллэрин кэтэһэбин. 2017 с. ахсынньы 15 күнүгэр сайабылыанньабар эппиэт суох. Бэйэлэрэ истэр буолан, холкулар, оттон биһиги, эрэйдэнэр дьон, ыксыыбыт. Чааһынай фирмалар аппарааттарын хайҕыыллар аҕай. Биһиги курдук атыылаһар кыаҕа суохтарга оннук үчүгэй аппарааты биэрэллэрэ буоллар, судаарыстыбаҕа махтаныа этибит.
Ол суох. Ол оннугар үлэлээбэт аппарааты ытарҕа курдук кэтэ сылдьабыт».
Константин ЕРЕМЕЕВ,
Нам улууһа, Кыһыл Сыыр.
Эрэдээксийэбитигэр ааҕааччыбытыттан маннык сурук киирбитэ. Бу күннэргэ Саха Өрөспүүбүлүкэтигэр РФ социальнай страховкатын пуондатын эрэгийиэннээҕи отделениетын салайааччытын солбуйааччы Е.А.Алексеевтан туппут эппиэппитин бэчээттиибит.
— Тэхиньиичэскэй тэриллэри туһаныы болдьоҕун, уларытыллар кэмин РФ Үлэҕэ уонна социальнай сайдыыга министиэристибэтэ олохтуур.
Тиэкистээх төлөпүөнү (ол иһигэр, суотабай төлөпүөнү, смартфоны) сэттэ сыл туһаныллар. Маннык тэрилинэн Константин Еремеев 2011 с. ахсынньыга хааччыллыбыта. Эһиги кини суругун биһиэхэ ыытар кэмҥитигэр аппараатын болдьоҕо ааһа илик, төлөпүөнү суһаллык уларытыы эбэтэр өрөмүөннүүр наада тура илигэ. Кини «Бриз 441 Мах» мааркалаах күүстээх истэр аппарааты 2017 с. сэтинньигэ ылбыта. Ахсынньы 15 күнүгэр кини аппараатын итэҕэстэрин туораттара поставщикка бэриллибитэ. Онон истэр аппараата оҥоһуллан, туһанааччыга бэрилиннэ.
Надежда ЕГОРОВА, «Саха сирэ» хаһыат, edersaas.ru