Бу күннэргэ Дьокуускайга Кытай Өрөспүүбүлүкэтин “Нункен” киин балыыһатын сэбиэдиссэйэ, онколог, профессор Гао Фэн кэллэ.
edersaas.ru
Гао Фэн искэн ыарыытын сэрэтии уонна быһаарыы боппуруостарыгар ХИФУ үөрэнэр куорпуһугар медиа-форумҥа кытынна.
Профессор медиа-форум кыттыылаахтарын ыйытыыларыгар тылбаасчыт көмөтүнэн сиһилии хоруйдары биэрдэ. Кини быһаарбытынан, искэн үөскээһинэ үгүс төрүөттээх – тулалыыр эйгэ киртийиитэ, куһаҕан дьаллыктар, олох укулаатын уларытыы уо.д.а. Ол гынан баран, ген дьайыыта 90 бырыһыаны ылар.
Кытай онколога искэни эмтиир ньымалартан ордук иммуннай терапияны көдьүүстээҕинэн ааҕар. Тоҕо диэтэххэ, иммунотерапия кыһалҕаны төрдүттэн быһаарыан сөп. Ол гынан баран, чахчы көдьүүстээҕин ыарыһахтар 20 эрэ бырыһыаннара билбит. 80 бырыһыаннарыгар эмтээһин атын көрүҥнэрэ наада буолбуттар.
“Искэни букатыннаахтык кыайыахха сөп дуо?” диэн ыйытыы хас биирдии киһини долгутар. Онуоха Гао Фэн искэни эрдэттэн булуу улахан суолталааҕар болҕомтотун туһаайда. Төһөнөн эрдэ булаҕын да, букатыннаахтык үтүөрэргэ эбэтэр уһун кэмнээх ремиссияны ааһарга кыах бэриллэр.
«Искэни эрдэттэн буларга бырабыыталыстыба өттүттэн дьайыылар уонна дьаһаллар наадалар. Сокуон таһымыгар чинчийиилэри систиэмэлиэххэ наада. Өйдөөҥ, бу биир эрэ киһи дьыалата буолбатах! Бу уустук кыһалҕа судаарыстыба таһымыгар быһаарыллыахтаах», – диэтэ.
Медицина төһө да балысханнык сайдарын иһин, искэни букатыннаахтык эмтээһин бырыһыана кэнники 50 сылга улааппатаҕын кэриэтэ.
Надежда ЕГОРОВА, «Саха сирэ» хаһыат, edersaas.ru