Бүгүн «Арассыыйа — мин историям» Историческай пааркаҕа «Дьоруойдар тустарынан» диэн мультимедийнэй быыстапка аһылынна.
Бу тэрээһин 21-с үйэ дьоруойдарыгар — эйэлээх кэмҥэ террористары кытта сэриилэһэ сылдьан, сырдык тыыннарын толук биэрбит эдэр дьоҥҥо ананна.
Экспозиция Бүтүн Арассыыйатааҕы норуоттар икки ардыларынааҕы «ПроРФ: Про Россию! Про тебя!» араас омугу сомоҕолуур аахсыйа чэрчитинэн тэрилиннэ. Экспозицияҕа 54 Арассыыйа Дьоруойун бочуоттаах аата киирдэ.
— «Эһиги тускутугар, оҕолор! Биһиги оннубутугар үлэлээҥ уонна олоруҥ, доҕоттор!» диэн бүтэһиктээх санаалаах төрөөбүт дойдуларын туһугар олохторун толук биэрбит эдэр дьону сүрүннээн ыччаттар чиэстии кэлбиттэрэ хайҕаллаах суол. Кыһыл Аармыйа төрүттэниитин 100 сылыгар анаан «Арассыыйа — мин историям» Историческай паарка Ийэ дойду уонна хорсун быһыы тиэмэтин умнубаппыт туһугар болҕомтотун ууран үлэлииригэр барҕа махталбытын тиэрдэбит, — диэн бэлиэтээтэ гражданскай уопсастыба институттарын сайдыытын миниистирэ Анатолий Бравин.
Историческай паарка дириэктэрэ Дмитрий Соловьев ыччаттарга туһаайан:
— Арассыыйабыт сайдыытын уонна бөҕөргүүрүн туһугар олохторун толук биэрбиттэри умнуо суохтаахпыт. Кинилэр хорсун быһыыларын холобур оҥостон, үүнэр көлүөнэ дойдутун туһугар айарга-тутарга дьулуһуохтаах, — диэн санаатын тиэртэ.
Дьокуускайдааҕы култуура кэллиэһин 1-кы кууруһун устудьуона Владимир Охотин тэрээһин туһунан санаатын бу курдук эттэ:
— Биһиги, ыччаттар, дойдубут историятын хайаан да билиэхтээхпит. Олохторун толук уурбут Арассыыйа дьоруойдарын ааттарын үйэтитэр интэриэһинэй быыстапка тэриллибит. Онон историческай паарка саалаларынан сылдьан, доҕотторбун кытта экспозицияны анаан көрүөхпүт, үөрэтиэхпит.
Мичийэ Протопопова, МэҥэХаҥалас улууһун Балыктаах агрооскуолатын 9-с кылааһын үөрэнээччитэ:
— Бүгүн сарсыарда дойдубутуттан хоҥнон, икки чаас айаннаан кэллибит. Оскуолабыт актыыбыыстарга анаан путевка биэрбитэ. Онон дойдубут историятын үөрэтээри, үгүһү билээри-көрөөрү, истээри кэллибит, — диэн санаатын үллэһиннэ.
Балыктаах орто оскуолатын салалтата үүнэр көлүөнэни төрөөбүт дойдуга тапталы иҥэрэр тыыннаах иитиигэ «Арассыыйа — мин историям» Историческай паарка курдук бэлиэ сиргэ путевка биэрэн ыытара — атын оскуолаларга бастыҥ холобур.
Агрооскуола иитэр үлэҕэ дириэктэри солбуйааччы Герасим Егоров Историческай пааркаҕа үөрэтэр оҕолорун кытта аан бастаан сылдьар эбит.
— Оскуолабытыгар үтүө дьулуур (волонтер) хамсааһыныгар болҕомтобутун ордук уурабыт. Ол курдук, сэбиэскэй кэм пионердарын үтүө үгэһэ — тимуровскай үлэ кылаастарынан үллэрэн ыытыллар. Онно оҕолор тыыл уонна үлэ бэтэрээннэригэр, кыаммат дьоҥҥо отторугар-мастарыгар көмөлөһөллөр. Сайын аайы оскуола волонтердара нэһилиэкпитин тупсарыыга үлэлииллэр. Мин оскуоланы 2000 сыллаахха бүтэрбитим. Биһиги көлүөнэҕэ тэҥнээтэххэ, аныгы кэм оҕолоро көмпүүтэр технологията муҥутуурдук сайдан, үксүгэр ол өттүгэр тардыһаллар. Ол иһин учууталлар сүрүн сорукпут — үөрэтэр оҕолорбутун гражданскай-патриотическай санааҕа иитии, төрөөбүт дойдуларын историятын билэллэрин, олоххо көхтөөх буола сайдалларын ситиһии, — диэн бэлиэтиир тыа сирин учуутала.
«Арассыыйа — мин историям» Историческай пааркаҕа «Дьоруойдар тустарынан» мультимедийнэй быыстапка кулун тутар 7 күнүгэр диэри үлэлиэҕэ. Эйэлээх кэмҥэ террористары кытта сэриилэһэ сылдьан, сырдык тыыннарын толук биэрбит эдэр дьоҥҥо анаммыт экспозицияны кытта билсэргитигэр ыҥырабыт.
Елена ПОТОЦКАЯ, «Саха сирэ» хаһыат, edersaas.ru
Хаартыска: Мария Васильева (СИА) уонна ааптар түһэриилэрэ