Пасха күнүгэр 1100 киилэлээх аарыма кулич буһаран, Нөмүгүтээҕи килиэп оҥорор кэмбинээт уонна “Айгуль” гипермаркет акциялара Арассыыйа Рекордарын кинигэтигэр киирдэ. Тэрээһини Дьокуускайдааҕы уонна Ленскэйдээҕи епархия өйөөтө. Архиепископ Роман анаан сибэтии гынна, иеромонах Никандр мэлиибэн аахта.
Ангелина ВАСИЛЬЕВА, “Саха сирэ” хаһыат, edersaas.ru
Туоннаттан тахса ыйааһыннаах «Царь-кулич» диэн ааттаммыт минньигэс килиэби мустубут дьоҥҥо түҥэттилэр. Манна былырыыҥҥы курдук анньыһыы-үтүөлэһии тахсыбакка, барыта бэрээдэктээхтик ааста.
Арассыыйа Рекордарын кинигэтин кылаабынай экспердэ Роман Сенаторов бэлиэтээбитинэн, бу саамай улахан уонна ыарахан ыйааһыннаах кулич историяҕа киирдэ. Бу иннинэ Москваҕа 800 киилэлээх кулиһы буһаран тураллар.
“Бу сырдык бырааһынньык күн дьону түмэр, христианскай култуураттан ыраах дьону билсиһэргэ ыҥырар. Ким эрэ бэлэмнэммэккэ хаалар, ким эрэ ыарахан балаһыанньалаах, оттон Пасха баай-дьадаҥы диэн араарбакка, барыларын түмэр. Бу күн ким да аччык уонна соҕотохсуйан хаалыа суохтаах”, — диэн епархия үлэһиттэрэ этэллэр.
Ангелина ВАСИЛЬЕВА, “Саха сирэ” хаһыат, edersaas.ru
Айаал ЧЕРНОГРАДСКАЙ түһэриитэ.