Бэҕэһээ Москва уобалаһын Одинцово куоратыгар саҕаламмыт көҥүл тустууга Арассыыйа чөмпүйэнээтигэр 57 уонна 65 киилэҕэ диэри ыйааһыннарга үс саха тустууга салгыы тустар.
Ол курдук, бүгүн 57 киилэҕэ диэри ыйааһыҥҥа Арыйаан Тютриммыт үһүс миэстэ иһин киирсиэҕэ. Кинини утары Абдулвагаб Шахбанов-Рамиз Гамзатов (иккиэн Дагестантан) хапсыһыы кыайыылааҕа тахсыаҕа. Бу иннинэ Арыйаан ыйааһын лидеринэн ааҕылла сылдьыбыт Азамат Тускаевы 3:1 ахсаанынан кыайан баран, Тываттан сылдьар Дондук-оол Хуреш-оолга кыһыылаахтык хотторон кэбистэ — 1:5.
65 киилэлээхтэргэ Дьулустаан Булатовпыт кимиилээхтик туһунна. Бастакы эргииргэ Москва бөҕөһө Артур Бадтиевтан кыайыылаах очукуону тиһэх сөкүүндэлэргэ ыһыгыннарда. Ол кэнниттэн Санкт-Петербург күүстээх маастара Марат Дедегкаевы 12:2 ахсаанынан баһыйа тутта. Салгыы финал 1/4-гэр тэҥ киирсиигэ 2013 сыллааҕы аан дойду чөмпүйүөнэ Бекхаг Гойгереевка баһыйтарда — 2:3. Онон эрэхтээх хапсыһыыга Баяр Цыпенов (Бурятия)-Марад Нуридинов (Татарстан) көрсүһүү кыайыылааҕын кытта тустуоҕа. Онно кыайдаҕына Начын Куулары (Тыва) кытта боруонса мэтээл иһин киирсэр кыахтаныаҕа.
Оттон Иван Ефремовпыт бастакы эргииргэ аан дойду, Европа призера Ахмед Чакаевка 4:11 ахсаанынан хоттордо. Уонна, Чакаев финалга тахсыбытынан, эрэхтээх хапсыһыыларга кыттар быраабы ылла. Олорго Даши Шарастепановы (Бурятия) уонна Ахмед Касумовы (Дагестан) кыайдаҕына, үһүс миэстэ иһин Ислам Даудовы (Чечня) кытта күөн көрсүөҕэ.
Эрэхтээх хапсыһыылар бүгүн киэһэ, Дьокуускай бириэмэтинэн 17-00 чаастан саҕаланыахтара. Оттон финаллар 00-30 буолуохтара.
Кыайыылааҕы быһаарар хапсыһыылар кыттыылаахтара:
57 кг — Хуреш-оол Дондук-оол (Тыва) — Заур Угуев (Дагестан).
65 кг — Бекхан Гойгереев (Чечня) — Ахмед Чакаев (Дагестан).
74 кг — Заурбек Сидаков (РСО-Алания) — Хетик Цаболов (РСО-Алания).
86 кг — Артур Найфонов (РСО-Алания) — Даурен Куруглиев (Дагестан).
97 кг — Абдулрашид Садулаев (Дагестан) — Владислав Байцаев (РСО-Алания).
Роман Попов
Хаартыска Интэриниэттэн ылылынна.