Одинцово куоракка буола турар көҥүл тустууга Арассыыйа чөмпүйэнээтигэр бүгүн 61, 70, 79, 92, 125 киилэҕэ диэри ыйааһыннарга хапсыһыылар саҕаланыахтара. Баларга саха тустууга оскуолатын уон биир иитиллээччитэ күүһүн холоһуоҕа.
61 киилэлээхтэргэ түөрт бөҕөспүт тустуоҕа: дойду былырыыҥҥы түһүлгэтин призера, байыаннай сулууспалаахтар ортолоругар аан дойду чөмпүйэнээтин финалиһа Дмитрий Аксенов, норуоттар икки ардыларынааҕы турнирдар призердара Эдуард Григорьев, норуоттар икки ардыларынааҕы кылаастаах спорт маастара Ньургун Александров, «Монголия Опен-2017» турнир призера Петр Павлов.
Бастакы эргииргэ Эдуард Григорьев — Мурат Тезадовы (Москва), Дмитрий Аксенов — Артем Гебековы (Дагестан), Ньургун Александров — Магомедрасул Магомедовы (Дагестан), Петр Павлов — Магомедрасул Идрисовы (Дагестан) кытта күөн көрсүөхтэрэ.
70 киилэҕэ диэри категорияҕа Иван Барашковпыт, Тимур Николаевпыт, Константин Власовпыт, Герман Устиновпыт уонна Ларион Андреевпыт тустуохтара. Кинилэр ыйааһын лидердэрэ Магомед Курбаналиевка, Евгений Жербаевка, Мурад Нухкадиевка, Алан Гогаевка «таһаҕас» буолуохтара диэн эрэнэбит.
79 киилэлээхтэргэ 19 саастаах Алексей Ефимовпыт, 92 киилэҕэ диэри ыйааһыҥҥа Саха сирин чөмпүйүөнэ Ньургун Сергиммит дойду бастыҥ бөҕөстөрүн кытта күүстэрин холоһуохтара.
Роман Попов
Хаартыска Интэриниэттэн ылылынна.