Санкт-Петербурга ыытыллыбыт «Арктика: билиҥҥи уонна кэнэҕэски кэмҥэ» Норуоттар икки ардыларынааҕы VII Арктическай форумҥа СӨ Култуура уонна искусство арктическай институтун ректора Саргылаана Игнатьева кыттыыны ылла.
edersaas. ru
Култуура уонна искусство арктическай институтун ректора «Арктика култуурунай нэһилиэстибэтэ» былаһааккаҕа «Арктика: культурология саҕахтара» диэн дириҥ ис хоһоонноох дакылааты оҥордо.
Алтынньы ый ортотугар институт ректора Саргылаана Игнатьева Санкт-Петербургдааҕы государственнай университет «Арктика сайдыытын боппуруостарыгар норуоттар икки ардыларынааҕы бииргэ үлэлээһин» диэн сыл аайы ыытар сэминээригэр анаан ыҥырыллан кыттыыны ылбыта.
Сэминээр сүрүн «Арктика норуоттарын култуурата уонна искусствота» диэн ааттаах сиэксийэтигэр бэрт үгүс суолталаах этии киирбитэ. Санкт-Петербургдааҕы государственнай университет уонна Култуура уонна искусство арктическай институт Арктика култууратын уонна искусствотын сайыннарыыга уонна пропагандалыырга араас ис хоһоонноох тэрээһиннэри бииргэ ыытар туһунан кэпсэтиини ыыппыттара, кэскиллээх үлэ тосхоллорун дьүүллэспиттэрэ. Бу киэҥ ыҥырыылаах мунньахха Арктика норуоттарын култуураларын олохтоохтук үөрэтэр сыалтан өрөспүүбүлүкэ хотугу улуустарыгар Санкт-Петербургдааҕы государственнай университет уонна СӨ Култуура уонна искусство арктическай институтун устудьуоннарын уонна преподавателлэрин кыттыгас экспедицияларын тэрийии туһунан кэпсэтии ыытыллыбыта.
— Норуоттар икки ардыларынааҕы VII Арктическай форумҥа «Арктика: культурология саҕахтара» диэн сиэксийэҕэ Арктика култууратын (култуура, история пааматынньыктара, заповедниктар) уонна тыытыллыбатах айылҕа (экология) туһунан кэпсэттибит.
Мин Арктика уонна Арассыыйа эпохалара саҕаламмытын бэлиэтээтим. Маннык форумнары ыытан, дойду үрдүкү салалтата Арктика сайдыытыгар улахан болҕомтотун уурда. Мин биһиги институппут хоту дойду культурологиятын уонна искусствотын чинчийиигэ туох сонун бырайыактары олоххо киллэрбитин билиһиннэрдим.
Саха сирин биир бөдөҥ үрдүк үөрэҕин кыһатын үөрэҕин систиэмэтэ Арктика регионугар олорор омуктар култуураларын уонна искусстволарын сайыннарыыга туһуланарын кэпсээтим. Уһук Хоту сиргэ үлэлии турар үрдүк үөрэх кыһалара Арктика социальнай-култуурунай кииннэринэн буолалларын бэлиэтээн туран, кинилэргэ тустаах болҕомтону ууралларыгар санаабын тиэртим. Мин киллэрбит этиилэрбин барытын өйөөн,»Арктика: культурология саҕахтара» сиэксийэ түмүк резолюциятыгар киллэрдилэр.
Москва куоракка ыытыллыахтаах Саха сирин күннэригэр биһиги институппут «Тымныы уонна Цивилизация» диэн киэҥ ыҥырыылаах, дириҥ ис хоһоонноох «төгүрүк остуолу» ыытаары бэлэмнэнэр. Бу туһунан иһитиннэриибин форум биир суолталаах сиэксийэтин кыттыылаахтара улаханнык сэҥээрдилэр, — диэн кэпсиир СӨ Култуура уонна искусство арктическай институтун ректора Саргылаана Игнатьева.
Онон Арктикаҕа түөлбэлээн олорор аҕыйах ахсааннаах норуоттар уонна араас омуктар култуураларын уонна искусстволарын сайдыытын боппуруоһа «Арктика: билиҥҥи уонна кэнэҕэски кэмҥэ» Норуоттар икки ардыларынааҕы VII Арктическай форумҥа киэҥник ырытылынна.
Елена ПОТОЦКАЯ, «Саха сирэ» хаһыат, edersaas. ru