«Өлүөнэтээҕи холбоһуктаах пароходство» АУо үгүс суудуналара быйылгы навигацияны этэҥҥэ түмүктээн, кыстыыр сирдэригэр айаннаан эрэллэр. Алтынньы 11 күнүнээҕи туругунан 1 мөл. 370 тыһ. тонна таһаҕас араас көрүҥүн өрөспүүбүлүкэ өрүстэринэн тастылар.
Арктика уонна хоту улуустарыгар 265 тыһ. т таһаҕаһы тиэйдилэр. Дьааҥы өрүһүнэн 124 тыһ. т, Тиксиигэ – 26 тыһ., Өлөөҥҥө – 2,5 тыһ., Анаабырга – 10 тыһ., Индигииринэн – 50 тыһ. . кэриҥэ, Халыманан – 28 тыһ., Красноярскай кыраайга – 3 тыһ. т кэриҥэ уонна Чукоткаҕа 22 тыһ. т кэриҥэ таһаҕас тиэрдилиннэ.
Бу күннэргэ Өлүөнэ өрүһүнэн тиэйии-таһыы үлэтэ түмүктэнэн эрэр. Мохсоҕоллоохтон 5000 тонна тутуу матырыйаала Чайыҥдаҕа илдьээри тиэйэн эрэллэр. Итиэннэ Пеледуйга тутуу матырыйаалын толору тиэммит суудуна айаҥҥа турунна.
Өлүөхүмэ улууһун Солянка бөһүөлэгин таһынан нөҥүө кытылтан улахан диаметрдаах турбалары таһыы ыытыллар. Аллараа Бэстээх пордугар «Саха сирин тимир суоллара» хампаанньаҕа анаммыт контейнердар аҕалыллан сүөкэнэллэрэ былааннанарын туһунан пароходство пресс-сулууспата иһитиннэрдэ.
Анивера Акимова, «Саха сирэ» хаһыат, edersaas.ru