Бу күннэргэ “ОДьХХ” ГУТ филиалын Нөмүгүтээҕи учаастагын гааһынан оттулар квартальнай хочуолунайа өрөмүөн кэнниттэн үлэлээтэ.
Түөрт эргэ хочуолу көтүрэн баран, ол оннугар икки саҥа КВР-2,0 Г Eco-flam горелкалаах хочуолу таҥан туруордулар. Маны таһынан аныгы носуостары туруордулар уонна үлэһиттэр анал миэстэлэрэ баар буолла.
ОДьХХ Хаҥаластааҕы филиалын Нөмүгүтээҕи учаастага саҥа хочуолунайданна. Бу үлэ уопсай сыаната — 6,5 мөл. солкуобай.
Өрөмүөннэниллибит хочуолунай үөрүүлээх арыллыытыгар үлэһиттэри улуус баһылыга Г. Алексеев, улуус Мунньаҕын бэрэссэдээтэлэ А. Антонов кэлэн эҕэрдэлээтилэр, Нөмүгү нэһилиэгин баһылыга Н. Устинов, Хаҥаластааҕы ОдьХХ филиалын салайааччыта Д. Николаев уонна кини сүбэһитэ А. Захаров, нэһилиэк тэрилтэлэрин үлэһиттэрэ кытыннылар.
Бу хочуолунай нэһилиэк социальнай суолталаах тэрилтэлэрин итиинэн хааччыйар. Инникитин аны хаарбах дьиэттэн көһөрүү бырагырааманан тутуллуохтаах элбэх кыбартыыралаах саҥа дьиэлэр холбоноллоро былааннанар, онуоха хочуолунай кыамтата толору эппиэттэһэр.
Ааптар: «Хаҥалас» хаһыат