«Арт-Ли» хампаанньа арыллынна

Ааптар: 
Бөлөххө киир:

Бүгүн, атырдьах ыйын 11 күнүгэр,  Марха сэлиэнньэтигэр Арассыыйа уонна Кытай бииргэ тэрийбит ХЭТ СПК «Арт-Ли» хампаанньа өрөгөйдөөх арыллыыта буолла. Тэрилтэни олохтооччунан Харбин куорат Хэйлунцзяннааҕы научнай-техническэй нэҥири харыстыыр матарыйааллардаах тутууларынан дьарыгырар «Биньли» уонна дьокуускай куораттан ХЭТ «ИнтерАрктика» буолаллар. «Арт-Ли» хампаанньа элбэх кыбартыыралаах, аҕыйах мэндиэмэннээх каркас дьиэлэри, коттеджтары тутарга анаан нэҥири харыстыыр панеллэри оҥорон таһаарыа. Тэрээһиҥҥэ Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Игорь Никифоров уонна Хабаровскай куоракка Кытай Народнай Өрөспүүбүлүкэтин генеральнай консула Го-Чицзюнь кыттыыны ыллылар.

edersaas.ru


Игорь Никифоров, Саха Өрөспүүбүлүкэтин бырабыыталыстыбатын бэрэссэдээтэлин солбуйааччы:

—«Арт-Ли» хампаанньа оҥорон таһаарар панеллэрэ Саха сиригэр улахан туһалаах буолуохтара. Сүрүннээн Хотугу улуустарга дьиэ тутуутугар туһаныллыахтара. Мин санаабар, «Арт- Ли» хампаанньа күүскэ сайдыа. Кинилэр оҥорор таһаарар нэҥири харыстыыр матырыйаалларын курдуктар Саха Өрөспүүбүлүкэтигэр туттулла иликтэр. Тутааччыларга барҕа махталбын тиэрдэбин уонна кэлэн иһэр Тутааччы күнүнэн эҕэрдэлиибин.

Го-Чицзюнь, Хабаровскай куоракка Кытай Народнай Өрөспүүбүлүкэтин генеральнай консула:

Бастатан туран , миигин бу тэрээһиҥҥэ ыалдьыт быһыытынан ыҥырбыккытыгар махтаныахпын баҕарабын. Кытай уонна Арассыыйа бэлиитикэ араас хайысхатыгар  дьүөрэлэһэн үлэлииллэрэ сайынна диэн бэлиэтиибин. «Арт- Ли» курдук хампаанньалар сайдыыны аҕалаллар. Маннык бырайыактарга угуллубут харчы боруостанар. Сылтан сыл аан дойдуга инновационнай техника сайдан иһэрин тухары, биһиги олох сайдыытын, тэтимин кытта тэҥҥэ хардыылаан иһиэхтээхпит.  «Арт-Ли» хампаанньа Саха Өрөспүүбүлүкэтин экэниэмикэтигэр төһүү күүс буолуо диэн бигэ эрэнэбин.

Николай ПОПОВ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0