Быйыл ахсынньы 6 күнүгэр Дьокуускайга Саха Өрөспүүбүлүкэтин бааһынай хаһаайыстыбаларын уонна тыа хаһаайыстыбатын кэпэрэтииптэрин ассоциациятын (нууччалыы кылгас аата – АККОР) отчуоттуур-быыбардыыр конференцията ыытыллыа. edersaas.ru
Онно бэлэмнэнэн, бу күннэргэ улуустар дэлэгээттэрин уонна кыттааччыларын испииһэгин түһэриэхтээхтэр. Дэлэгээттэргэ улуустардааҕы ассоциациялар сүбэлэрин чилиэннэрэ уонна бас-көс бааһынайдар киирэллэр. Ону сэргэ “Саҥа үлэлээн эрэр фермер” бырагырааманан быйыл грант ылбыт бааһынайдар (барыта 187 киһи) кыттааччы быһыытынан сылдьыахтара. Кинилэргэ анаан ити күн күнүскү чэйтэн киэһэ Тыа хаһаайыстыбатын министиэристибэтин мунньахтыыр саалатыгар семинар тэриллэрин иһитиннэрэбит.
Конференция Саха тыйаатырыгар аныгыс сэрэдэҕэ сарсыарда 10 чаастан күнүс 1 чааска диэри буолара былааннанар. АККОР сүбэтин бэрэссэдээтэлэ (бэрэсидьиэнэ) Валерий Ефремов үлэтин отчуоттаабытын кэнниттэн саҥа бэрэсидьиэни талыахтара. Билигин биллэринэн, тыа хаһаайыстыбатын уонна ас-үөл бэлиитикэтин урукку миниистирэ, билигин “Туймаада” хампаанньа генеральнай дириэктэрин солбуйааччынан үлэлии сылдьар Александр Артемьев кандидатурата баар. Киниттэн ураты АККОР бэрэсидьиэнэ буолуон баҕалаахтар элбэхтэр үһү эрээри, чуолкайа биллибэт.
Василий НИКИФОРОВ, edersaas.ru