Саха тыйаатырын кэлэктиибэ, улуустарынан гастролга барыан иннинэ, олунньу 18 күнүгэр биир идэлээҕин, СӨ үтүөлээх артыыската Мария Николаеваны үбүлүөйдээх 75 сааһынан эҕэрдэлээтэ.
Дьоро киэһэ бастакы түһүмэҕэр Мария Николаева оонньуур Н.Неустроев «Тиэтэйбит» кэмиэдьийэ-испэктээгэ итиэннэ киинэҕэ оруола көрдөрүлүннүлэр. Биллэрин курдук, кини “Утро долгого дня” диэн Ригатааҕы киностудия Саха сиригэр гражданскай сэрии дьоруойа И.Я.Строд туһунан 1968 сыллаахха устубут кэтит форматтаах, өҥнөөх киинэтигэр биир дьоһуннаах оруолу толорбута.
Мария Николаева тапталлаах Сахатын тыйаатырыгар 45 сыл айымньылаахтык, бэриниилээхтик үлэлээн кэллэ, 60-тан тахса араас уобараһы ситиһиилээхтик айда. Оттон режиссер быһыытынан туруорбут испэктээктэрин (Ф.Буляков“Ньургуһун иккистээн тылыннар”, Е.Неймохов “Сайсары күөлгэ түбэлтэ”, о.д.а. ) дьон эмиэ олус сэргии ылынар.
Артыыс дьоро киэһэтигэр Москваҕа, “Щепкинкэҕэ” бииргэ үөрэммит доҕотторо Зоя Багынанова, Прасковья Адамова, Степан Емельянов, Тимофей Сметанин, Фрументий Софронов кыттыыны ыллылар, устудьуон саастарын санаан, олус истиҥ ахтыылары оҥордулар. Үбүлүөйдээх артыысканы махталлаах көрөөччүлэрэ, тыйаатыр салалтата, доҕотторо, аймахтара, биир дойдулаахтара үөһээ бүлүүлэр, далырдар итиитик эҕэрдэлээтилэр.
Татьяна МАРКОВА, «Саха сирэ» хаһыат, edersaas.ru
Ыспыраапка
Николаева Мария Егоровна
Тыйаатыр уонна киинэ артыыската.
1943 с. олунньу 18 күнүгэр Үөһээ Бүлүүгэ төрөөбүтэ. 1966 сыллаахха Москватааҕы М.С.Щепкин аатынан Үрдүкү театральнай училищены бүтэрбитэ. 1966-1972 с.с. Ньурба тыйаатырыгар үлэлээбитэ. 1972 сылтан – П.А.Ойуунускай аатынан Саха академическай драматическай тыйаатырын артыыската.
Сүрүн оруоллара: Сыкына — “Күкүр-Уус”, Суорун Омоллоон, Тыаһааны — “Өлүөнэ сарсыардата”, И.Гоголев, Еремеевна – “Недоросль”, Д.Фонвизин, Нанди — “Көҥүл итии күнэ”, Суорун Омоллоон, Ийэ — “Оһуордаах Ураһа”, Сиэн Чолбодук, Марыына —“Куһаҕан тыын”, Н.Неустроев, Пруденсия – “Мастар охтубакка кэхтэллэр”, А.Касона, Матайар — “Оҕустар забастовкалара”, Д.Наумов, о.д.а.