“Арыгы – дьаат”: Пиибэ эр киһини дьахтардыҥы оҥорор

Бөлөххө киир:

Күндү ааҕааччыларым, бүгүн пиибэ туһунан кэпсэтиэҕиҥ.

Пиибэ буоккатааҕар, самогоннааҕар ордук буортулаах. Тоҕо диэтэр, көөнньөр кэмигэр дьааттаах альдегидтар, метаноллар үөскүүллэр, балар ыраас испииртэн оҥоһуллубут буоккатааҕар 10-100 төгүл элбэх буолаллар.

Пиибэни иһэргэ туох да төрүөт, бырааһынньык остуола наадата суох. Күн аайы соҕотоҕун да иһиэххэ сөп. Пиибэни оҥорооччулар көннөрү утах курдук рекламалыыллар. Холобур, куйаас күҥҥэ утаххытын ханнарыҥ диэн. Ол иһин оҕолор, дьахталлар аан бастаан арыгыны иһэ үөрэнэллэригэр, ылларалларыгар пиибэ оруола улахан. Саамай алдьархайа манна сытар. Арыгыга ылларбыттарын бэйэлэрэ да өйдөөбөккө хаалаллар. Аны пиибэһит киһи арыгыһыппын дэммэт, ону анозогнозия диэн уйулҕа ыарыытын быһыытынан быһаараллар. Пиибэнэн алкоголик буолбут киһи эмтэнэрэ быдан ыарахан.

Биир бытыылка пиибэни истэххэ, 50-100 грамм буокканы испит курдук буолаҕын. Ол эбэтэр 5-6 бытыылка пиибэни испит киһи бытыылка буокканы испит курдук итирэр. Ону тэҥэ пиибэнэн саҕалаан баран, буокканан бүтэрэр куһаҕан үгэс баар.

Сорохтор пиибэ туһалаах, битэмииннээх дииллэр. Битэмиин солодка баар, ол эрээри, пиибэ оҥоһуллар кэмигэр битэмиинэ бэрт кыра хаалар. Холобур, В битэмиин сууккатааҕы нуорматын ылаары 10 лиитирэ пиибэни иһиэххэ наада.

Ону тэҥэ пиибэ организмтан белоктары, углеводтары, калийы, магнийы, С битэмиини суурайан таһаарар. Бүөргэ, быарга, сүрэххэ, ноорго, үөскэ куһаҕаннык дьайар.

Пиибэни иһэр дьон улахан истээхтэрин бары билэбит. Ону тэҥэ эр киһи быһыыта-таһаата дьахтардыҥы буолан барар – уойар, түөстэнэр, самыыланар, оннооҕор куолаһа, майгыта уларыйар. Гормон оҥорор бүөр былчархайдарыгар, ноорго дьайар буолан, эр киһи баҕатын баттыыр, потенциятыгар куһаҕаннык дьайар. Дьахтар гормоннарыгар чугас фитоэстрогеннардаах буолан, эр киһи организма улам уларыйан барар, сыыйа оҕолонор кыахтан матар.

Онон, пиибэни иһиэх иннинэ, толкуйданыҥ – кылгас кэмнээх дуоһуйуу маны барытын толуйар дуо? Оҕолоргутугар, сиэннэргитигэр аһаҕастык кэпсээҥ – пиибэ буортутун биллиннэр.

Матвей Лыткин,

edersaas.ru сайтка анаан.

+1
0
+1
0
+1
0
+1
0
+1
0
+1
0
+1
0