Ааспыт нэдиэлэҕэ Дьахталлар аан дойдутааҕы күннэрэ буолан ааста. Хас биирдии омукка дьахтар сүҥкэн оруоллаах, киинттэн бүтүн норуот инникитэ тутулуктаах.
Саха сирин дьахталлара тыйыс айылҕаҕа төрөөбүт уонна улааппыт буоланнар, күүстээх санаалаахтар, тулуурдаахтар. Дьахтар норуоту иитэн таһаарааччы уонна алаһа дьиэ аал уотун араҥаччыта буолар. Кини доруобуйата, чөл өйө-санаата уонна иитиитэ оҕолорун олохторугар сүҥкэн оруолу оонньуур. Ыал ийэтэ чөл олоҕу тутуһар, арыгыны-табаҕы утарар буоллаҕына, оҕолоро чөл олохтоох, үөрэххэ-үлэҕэ, спорка тардыһыылаах, сайдам санаалаах, тобуллаҕас толкуйдаах, инникигэ эрэллээх буолаллар. Ийэ, аҕа кыратык да арыгыны иһэр буоллахтарына, оҕо доруобуйатыгар улахан охсуулаах уонна алдьатыылаах.
Статистика этэринэн, бүгүҥҥү көрдөрүүлэринэн, Арассыыйа үрдүнэн 2 % муус доруобай оҕо төрүүр буолбут, 98 % оҕо төрүүрүгэр араас ыарыылардаах, нуорматтан тэйиилээх буолар эбит. Аны туран, тулаайах оҕолорго аналлаах дьиэлэргэ төрөппүттэрэ 90 %-ра тыыннаах эрээри, бырааптара быһыллыбыт эбиттэр. Бу курдук арыгы дьон олоҕор ыар содулу оҥорор, инникини быһар.
Саха сиригэр чөл олох пропагандатын үксүн дьахталлар ыыталлар. Олор быыстарыгар ыал ийэлэрэ, эбэлэрэ, эдьийдэрэ уонна балтылара бааллар. Кинилэр бэйэлэрин эрэ күннээҕи түбүктэрин быһаарбакка, нэһилиэк, улуус, бүтүн өрөспүүбүлүкэ таһымнааҕы үлэни-хамнаһы оҥороллор, быһаарсаллар. Кинилэр арыгыны утары охсуһууга сүҥкэн кылааттара чөл олох хамсааһынын сайыннарар, дьон олоҕун-дьаһаҕын тупсарар.
Күндү ийэлэрбит, эбэлэрбит, эдьийдэрбит, балтыларбыт, эһигини ааспыт сааскы бырааһынньыккытынан итиитик-истинньик эҕэрдэлиибин. Эһиги олоххо тардыһыыгыт, дьоҥҥутугар, норуоккутугар истиҥ-сылаас сыһыаҥҥыт, кыһамньыгыт биһигини кынаттыыр, үрдүк чыпчааллары дабайарга көмөлөһөр.
Чөл олохтоох, норуоккутугар, дьоҥҥутугар бэриниилээх буолуҥ, үлэҕитигэр уонна уопсастыбыннай хамсааһыннаргытыгар ситиһиини баҕарабын. Куруук үөрэ-көтө сылдьыҥ, нарын-намчы, кэрэчээн сибэкки кэриэтэ олохпутун киэргэтиҥ!
Матвей Лыткин,
CӨ Арыгы атыытын сүрүннүүр управлениетын салайааччы.