Муус устар 10 күнүгэр Мэҥэ Хаҥалас улууһун Майа сэлиэнньэтигэр “Чөл нэһилиэктэн – чөл өрөспүүбүлүкэҕэ” форум ыытыллан ааста. Бу аан бастакытын ыытыллыбыт тэрээһин 360-тан тахса кыттааччыны хомуйда.
Сахалин курдук ыраах сиртэн Спорт, туризм уонна ыччат бэлиитикэтин министиэристибэтигэр үлэлиир Евгения Карленкова кэлэн ыалдьыттаата, Саха сирэ арыгыны утары ыытар үлэтин олус интэриэһиргээтэ. Ону тэҥэ, биллиилээх экстремал-айанньыт Валентин Ефремов тохтоон, билсэн ааста. Кини Аллараа Новгородтан “Трезвая Россия” былааҕын Дежнев чыпчаалыгар илдьэ баран иһэр. Саха сиринээҕи “Трезвая Якутия” уопсастыбаннай хамсааһын чилиэннэрэ бэйэлэрин былаахтарын киниэхэ биэрэн ыыттылар.
Форум тэрийээччилэрэ түөрт бөлөҕү туспа бырагыраамаларынан үлэлэттилэр. Ыччаттар мусуой дьиэтигэр мустаннар, олоххо киириэн сөптөөх саҥа бырайыактары ырыттылар. Ол түмүгэр, чөл олоҕу пропагандалыыр киинэни устуу, ыарахан балаһыанньаҕа сылдьар дьоҥҥо көмө, интэриниэт эйгэтигэр үлэлэһии бырайыактара ордук чорбойон таҕыстылар. Маны таһынан, ыччат чөл олоҕу сүрүннүүр сэбиэтэ тэрилиннэ.
Биллиилээх лектордар оскуола оҕолоругар кылаас чаастарын ыыттылар, араас саҥа методикалар тустарынан кэпсээтилэр. Маннык педагогическай уопуту тарҕатыы чөл олох пропагандатын биир тутаах хайысхата буолар. Маны тэҥэ, педагогтар оҕолор ортолоругар буруйу оҥорууну сэрэтии хайысхалаах үлэлэрин көмүскээтилэр, уопут атастастылар.
Түмүгэр, арыгы атыытын боппут чөл олохтоох нэһилиэктэртэн бастыҥ үлэлээхтэри наҕараадалаатылар. Грамоталары Нам Түбэтин, Хаҥалас Булгунньахтааҕын, Горнай Бэс Күөлүн, Уус Алдан Тумулун, Мэҥэ Хаҥалас Томторун баһылыктара туттулар.
Бу ыытыллыбыт тэрээһин биир кылгас күн иһигэр сүрдээх элбэх сыалы-соругу толордо. Ол курдук, форумҥа Майа сиригэр мустубут дьон киирбит этиилэри ырытан, биир уопсай ыҥырыы оҥорон, арыгыны утары үлэ салгыы хайысхаларын ыйдылар.
Матвей Лыткин,
СӨ арыгы атыытын сүрүннүүр управление салайааччыта.