“Тэтим” араадьыйаҕа нэдиэлэ ахсын тахсан, арыгы, табах, наркотик буортутун туһунан кэпсиибин. Бу сырыыга наркотиктан быыһаммыт уолу ыҥыран, кэпсэттибит. Аатын уларыттыбыт, Иннокентий диэххэ. Сааһа 30-чалаах.
Аан бастаан наркотигы 7-с кылааска үөрэнэ сылдьан боруобалаабыт. “Биирдэ боруобалаатаххына, туох да буолбат” диэбиттэрин итэҕэйэн, хаһан баҕарар быраҕыам дии саныыр эбит. Ол кэнниттэн табаҕы, пиибэни боруобалаан, ылларан барбыт.
Оскуола кэнниттэн хас да күнү быһа “запойдаан” иһэр, арыгыта, наркотига суох биир да күн сатаммат буолбутун кэннэ, кыһалҕа үөскээбитин, дьэ, билиммит. Ханна арыгы баар да, онно – наркотик, охсуһуу, харчыга иэскэ ыйаныы, үлэлээбэккэ ускул-тэскил сылдьыы, доруобуйаны сүтэрии, о.д.а. саҕаланар. Эдэр киһи олоҕо алдьанан киирэн барар. Ити барыта арыгыттан сылтаан. Онтон 8 сылы быһа быраҕа сатааһын, эмтэнии, иһэн кэбиһии, эмиэ эмтэнии ыарахан, унньуктаах уһун суолун ааспыт.
Кини билигин букатын атын киһи, урукку олоҕор төннүбэт санаалаах, инники олоҕун былаанныыр, иккистээн төрөөбүт курдук сананар.
—Арыгыттан уонна наркотиктан итирии туох уратылааҕый?
—Арыгыны истиҥ да искэр туох эрэ киирбитин курдук, олус кырыктаах буолаҕын, сутуруккун туппутунан сылдьан, наар охсуһуоххун эрэ баҕараҕын, ол кэннэ тугу да өйдөөбөккүн. Ол иһин өлөрсүү, буруйу оҥоруу тахсар. Оттон наркотиктан итирэн баран, барытын хонтуруоллуугун, арыый холкугун эрээри, онтон аккаастанар, быраҕар быдан ыарахан. Ким да көмөтө суох, соҕотоҕун кыайан бырахпаккын. Мин 8 сыл устата туруулаһан, бырахтым, ону даҕаны элбэхтик эмтэнэн. “Алмаас” диэн наркологическай кииҥҥэ эминэн эмтээн баран, түҥ тыаҕа таһааран, үлэнэн чэбдигирдэллэр. Онно ким да суох сиригэр, өйүҥ-санааҥ ыраастанар, этиҥ-сииниҥ тулуйарга үөрэнэр. Күүстээх санаа, хара үлэ уонна айылҕа көмөлөһөллөр эбит.
— Ыччаттарга тугу баҕарыаҥ этэй?
— Саамай сүрүнэ, саҕалаамыахха наада. Бу – олоххун алдьатар суол, ылларбыккын билбэккэ да хаалыаҥ. Бэйэбинэн биллим, быраҕар хайдах курдук ыараханын. Билигин мин олоҕум тосту уларыйда, инники былааннар баар буоллулар, үлэлиибин, ыал буолаары сылдьабын.
— Иннокентий, инники олоххор ситиһиилэри баҕарабын!
Матвей Лыткин,
edersaas.ru сайтка анаан.