Муус устар 10 күнүгэр чөл олохтоох нэһилиэктэр форумнара буолан ааста. Форум чэрчитинэн Майа кыраайы үөрэтэр мусуойугар ыччат салаата үлэлээбитэ. Мэҥэ Хаҥаластан, Хаҥаластан, Чурапчыттан, Намтан, Сунтаартан, Ньурбаттан, Бүлүүттэн, Муоматтан, Эбээн-Бытантайтан, Дьокуускайтан чөл олоҕу тутуһар уонна тарҕатар ыччаттар кэлбиттэрэ.
Бу салаа ыччаты чөл олоҕу тутуһарга, өй-санаа, сиэр-майгы өттүнэн чэбдик буоларга үөрэтэр, ыҥырар сыаллаах ыытылынна.
Эдэр ыччат уонна чөл олох иккиэн биир ситиминэн сылдьыахтаахтар. Саха сирин инники кэскилэ ыччаттартан тутулуктаах. Оҕолорбут, ыччаппыт чэгиэн, чөл туруктаах буоллахтарына, инникигэ эрэллээхпит. Үүнэр көлүөнэбит арыгы иһэр, табах тардар, наркотигынан үлүһүйэр буоллаҕына — инникибит кэхтэр, симэлийэр.
Ол иһин СӨ арыгы ырыынагын сүрүннүүр судаарыстыбаннай управлениета быйылгыттан саҕалаан эдэр дьону кытта үлэтин күүһүртэ. Бэс ыйыгар ыччат чөл олоҕу сүрүннүүр сэбиэтэ мустуохтаах. Сүбэҕэ улуустар, нэһилиэктэр, куораттар, уопсастыбаннай тэрилтэлэр, үөрэх кыһаларын бэрэстэбиитэллэрэ киириэхтэрэ.
Ыччат сүбэтэ өрөспүүбүлүкэҕэ эдэр дьоҥҥо чөл олоҕу тарҕатыыга саҥа бырайыактары үлэлэтиэхтээх. Майаҕа мустубут ыччаттар чөл олоҕу пропагандалыыр киинэни устууга, ыарахан балаһыанньаҕа сылдьар дьоҥҥо көмөлөһөргө, интэриниэт эйгэтигэр саҥа, сонун бырайыактары үлэлэтиэххэ диэн этии киллэрдилэр.
Бу форумҥа ыччат бэйэтин олоххо саҥалыы көрүүтүн көрдөрдө, чөл олох туһугар үлэлэһэргэ бэлэмнээҕин биллэрдэ. Чаҕылхай ыччаттары көрөммүн үөрдүм, чөл туруктаах эдэр көлүөнэ баарыттан киэн тутуннум.
Кэнники кэмҥэ эдэрдэр спортивнай саалаларга, стадионнарга сылдьан дьарыктаналлара, доруобуйаларын көрүнэллэрэ – бу улахан үөрүүлээх көстүү. Оччоҕо кинилэр өйдөрө-санаалара эмиэ чэбдик буолуо, доруобуйаҕа буортулаах куһаҕан дьаллыктарга ылларыахтара суоҕа диэн эрэлбит улахан.
Эдэр киһи өйө-санаата чөл олоҕу талыахтаах, кута-сүрэ чэгиэн буолуохтаах, оччоҕо эрэ Сахабыт сирэ сайдыа, кэскиллэниэ.
Ыччат чөл олоҕу талар!
Матвей Лыткин, СӨ арыгы ырыынагын сүрүннүүр судаарыстыбыннай управление салайааччыта.
«Саха сирэ» хаһыат, edersaas.ru сайтка анаан.