Аҕыйах сыллааҕыта арыгыны олох испэт киһи уопсастыбаҕа “үрүҥ тураах” курдук көстөр буоллаҕына, билигин балаһыанньа лаппа уларыйда диэххэ сөп.
Арыгыны иһиини утарар үлэни утарсааччылар (сүнньүнэн арыгы атыытыгар сыһыаннаах дьон) киһи арыгыта суох сатаан олорбот, ханнык баҕарар киһи кэмиттэн кэмигэр аһыы ууну “култуурунайдык” иһиэхтээх диэн теорияны тарҕата сатыыллар.
Эппиэтин биһиги оҕолорбутугар көрүөххэ сөп. Балаҕан ыйын 1 күнүгэр хас сыл ахсын уонунан тыһыынча оҕо оскуола боруогун атыллыыр, кинилэр күн сиригэр саамай дьоллоох дьон, биир сиргэ таба олорбот курдук күнү быһа хамсаналлар уонна, саамай сүрүнэ, биир да кыраам арыгыга, табахха наадыйбаттар. Мантан да көрдөххө, киһи организма айыллыбытынан, биир да наркотикка наадыйбат. Онон, үйэлэригэр аһыы аһы амсайбатах дьон бааллар.
Оттон тоҕо нэһилиэнньэ ортотугар баһыйар үгүс өттө бу ааттаммыт наркотическай дьаакка ылларарый диэн ыйытааччылар.
Статистика этэринэн, оскуоланы бүтэрэр оҕолор 80 %-ра номнуо арыгыны-табаҕы боруобалаабыт буолаллар эбит. Маныаха кинилэргэ сүрүннээн киинэ, интэриниэт нөҥүө арыгылааһын, табахтааһын бырагыраамата киирэр эбит. Ол курдук, арыгыны, табаҕы оҥорор уонна атыылыыр хампаанньалар маннык ис хоһоонноох киинэлэр спонсордара буолаллар эбит. Холобур, киинэҕэ арыгыны, табаҕы элбэхтик көрөбүт.
Түмүккэ этэр буоллахха, Ф.Г. Углов өр сыллаах чинчийиилэрэ этэллэринэн, ханнык баҕарар норуот инникитэ табахтааһынтан, арыгылааһынтан улахан тутулуктаах.
Саха сирин олохтоохторо, саамай дьоллоох дьон — оҕолорбут холобурдарын батыһыаҕыҥ, арыгыттан-табахтан аккаастаныаҕыҥ!
Матвей Лыткин, edersaas.ru сайтка анаан.