Күһүн ахсын баччаларга «Сайсары» Бааһынай ырыынагар өрөспүүбүлүкэтээҕи ас-үөл быыстапка-дьаарбаҥката буолар үгэстээх. Быйылгы «Ас-үөл — 2017» быыстапка-дьаарбаҥка Саха сирэ Россия састаабыгар киирбитэ 385, Тыа хаһаайыстыбатын уонна ас-үөл бэлиитикэтин министиэристибэтин 95 сылларыгар ананан, балаҕан ыйын 22-24 күннэригэр ыытыллыаҕа.
Бу үс күн устата «Сайсары» Бааһынай ырыынагар, Хомсомуол болуоссатыгар араас улуустартан тыа хаһаайыстыбатын табаарын оҥорооччулар бэйэлэрин бородууксуйаларын аҕаланнар атыылыахтара, АПК үлэһиттэрин уус-уран кэнсиэртэрэ, ресторатордар уонна уопсастыбаннай аһылык тэрилтэлэрин маастар-кылаастара, быыстапкаҕа кэлбит дьоҥҥо көрдөөх күрэхтэһиилэр тиһигин быспакка ыытыллыахтара. СГТХА ипподромугар тыа хаһаайыстыбатын тиэхиньикэтин уонна племенной сүөһүлэр быыстапкалара, ат сүүрдүүтэ буолуохтара.
Быыстапка-дьаарбаҥка дьаһала манан эрэ бүппэт: бээтинсэҕэ сарсыарда 11 чаастан Тыа хаһаайыстыбатын уонна ас-үөл бэлиитикэтин министиэристибэтин аактабай саалатыгар биллиилээх хаһаайыстыбанньык Семен Гаврильевич Жиркову 95 сааһын туолбутунан чиэстээһин, киэһэ 6 чаастан сибиинньэ иитэр хаһаайыстыбалар салайааччыларын мунньахтара ыытыллыахтара. Субуотаҕа Бааһынай ырыынагар күнүс 3 чаастан сиртэн үүнээйини ылыыга идэтийбит хаһаайыстыбалар сүбэ-мунньахтара буолуоҕа. Биир кэрэхсэнэр дьаһал Хатаска тэриллиэҕэ: отут үс сыл “Хатас” сопхуоска дириэктэрдээбит Парасковья Павловна Федороваҕа анаан, хатыҥ аллеята олордуллуоҕа.
Киин куорат олохтоохторо уонна ыалдьыттара!
Быыстапка-дьаарбаҥка дьаһалларыгар көхтөөхтүк кыттыҥ, кыстыыр аскытын-үөлгүтүн хааччыныҥ.
Раиса Сибирякова, “Саха сирэ” хаһыат, edersaas.ru.