«АТБ баан моҥкуруут баран эрэр дуо? Ипотекалаах дуогабардарын атын бааҥҥа атыылаабыт дииллэр. Кризис тыына биллэн эрэр дуу…». Маннык сурах бүгүн социальнай ситимнэринэн тарҕанан, үгүс киһи долгуйда.
Тугун-ханныгын билээри, «АТБ» баан Дьокуускайдааҕы филиалын консультаннарын кытары сибээскэ тахса сылдьыбыппар, үп-харчы ырыынагар бигэ туруктаахтарын уонна сабыллар былааннара суоҕун туһунан эттилэр.
Оттон ипотека дуогабарын атыытын туһунан ыйытыыга: «АТБ дуогабарыгар кирэдьиит биэрээччи баай-дуол солуогун докумуонун атын бааҥҥа биэриэн сөбүн туһунан пуун баар. Докумуоҥҥа илии баттыылларыгар ити усулуобуйаҕа сөбүлэһэллэрин туһунан бигэргэтэллэр», – диэн хоруйдаатылар.
«Азиатскай-Тихоокеанскай Баан», кылгатан эттэххэ, «АТБ» Сибиир уонна Уһук Илин 19 эрэгийиэнигэр үлэлиир. Дойду 100 бастыҥ баанын испииһэгэр киирэр.
Былырыын сэтинньигэ АТБ баан лицензиятын былдьатан, Дьокуускайдааҕы филиала сабыллан эрэр үһү диэн сураҕы тарҕаппыттара. Онон, бу бааны сыл ахсын саба сатаан, араас сураҕы ыһа-тоҕо социальнай ситимнэринэн ыыталлар.
Эбэн эттэххэ
banki.ru суруйарынан, АТБ бааны бас билээччилэртэн биирдэстэрэ Андрей Вдовин моҥкуруут баран эрэр үһү. 11 мөл. доллар иэстээҕин суруйаллар.
Анивера Акимова, «Саха сирэ» хаһыат, edersaas.ru