АТЭС-ка хааман иһэн кэпсэтии

Ааптар: 
Бөлөххө киир:

Сэтинньи 10-11 күннэригэр Вьетнамҥа, Дананг куоракка «Азия-Тиихэй акыйаан экономикаларын бииргэ үлэлээһиннэрэ» (АТЭС) форум 25-с саммитыгар Азия-Тиихэй акыйаан регионугар көҥүл эргиэн хабар эйгэтин кэҥэтии тула киэҥ кэпсэтии ыытылынна.

edersaas.ru


Элбэҕи быһаарбыт көрсүһүүлэр

Россия Бэрэсидьиэнэ Владимир Путин саммит кэмигэр Вьетнам Бэрэсидьиэнэ Чан Дай Куангы, Филиппин Бэрэсидьиэнэ Родриго Дутертены, КНР Бэрэссэдээтэлэ Си Цзиньпины уонна Япония Премьер-миниистирэ Синдзо Абэни кытары көрүстэ. Ол түмүгэр, бииргэ үлэлээһини кэҥэтиигэ боччумнаах быһаарыылар ылылыннылар. Холобур, Кытай баһылыгын кытары кэпсэтии эргиэни кэҥэтиигэ итиэннэ Соҕурууҥҥу, Хотугу Кореяларга сыһыаҥҥа иэҕилиннэ. Владимир Путин солуута суох мөккүөрү тохтотон, остуол тула олорон кэпсэтэр уолдьаста диэтэ. Синдзо Абэни кытары сэһэргэһии эйэ туһунан дуогабарга туһуланна. Филиппин баһылыга сэрии сэбинэн хааччыйбытын иһин Россия Бэрэсидьиэнигэр махтанна. Родриго Дутерте быйыл ыам ыйыгар Россияҕа кэлэ сылдьар былаана Маравига террористар саба түһэннэр тохтообута.

Вьетнам баһылыгын Чан Дай Куангы кытары көрсүһүүгэ эрдэтээҥҥи сөбүлэһии бигэргэнэн, «Газпромнефть» хампаанньа Вьетнамнааҕы «Зунгкуаты» ньиэбинэн хааччыйарга, «Петровьетнам» хампаанньаны кытары гаас уматыгы оҥорор кыттыгас тэрилтэни тэрийэргэ, «КАМАЗ» уонна «ГАЗ» хампаанньалар массыынаны оҥорууга, «Уралвагонзавод» технология өттүнэн сэбилээһиҥҥэ үлэлиир буоллулар. Даҕатан эттэххэ, ити ньиэп “ИСТА” ситиминэн тиэрдиллэр буолуохтаах, онон Саха сирин ньиэбэ Вьетнамҥа тиэрдиллэр кыахтанна диэтэхпитинэ, сыыстарыахпыт суоҕа.

Трамптыын олохтоохтук кэпсэппэтилэр 

Форумҥа кэлбит суруналыыстар икки бөдөҥ дойду, Россия уонна АХШ, баһылыктара хайдах көрсөллөрүн, тугу кэпсэтэллэрин бэркэ кэтээбиттэрэ-манаабыттара, үгүстэр хаҕыс соҕус көрсүһүү буолуо диэбиттэрэ. Владимир Путин Дональд Трампы кытары атах тэпсэн олорон сэһэргэспэтилэр, ол оннугар форум лиидэрдэрин хаартыскаҕа түһэрии иннинэ хааман иһэн кылгастык кэпсэттилэр. Икки дойду салайааччылара Сирияҕа терроризмы утары охсуһууга оҥоһуллубут холбоһуктаах сайабылыанньаны биһирииллэрин биллэрбиттэрэ.

Саммит түмүгүнэн тэриллибит пресс-кэмпириэнсийэҕэ суруналыыстар көрсүһүү олус кылгастык буолбутун бэлиэтээбиттэригэр, Владимир Путин ол да буоллар, кэпсэтиэхтээх боппуруостарбытын толору быһаарыстыбыт диэтэ. Оттон Трамп суруналыыстар ыйытыыларыгар хоруйдууругар Россия туһунан маннык эттэ:

— Россияны кытары охсуһуохтааҕар, эйэлээхтик сыһыаннаһар наадатын мин өйдүүбүн, ол аан дойдуга даҕаны, биһиэхэ даҕаны олус туһалаах буолуоҕа. Терроризмы утары охсуһарга, Корея кириисиһин итиэннэ Сирия уонна Украина боппуруостарын быһаарарга.

Ыспыраапка

1989 с. тэриллибит АТЭС (Азиатско-тихоокеанское экономическое сотрудничество) форумугар уон тоҕус дойду (Австралия, Бруней, Вьетнам, Канада, Кытай, Индонезия, Малайзия, Мексика, Новай Зеландия, Папуа-Новая Гвинея, Перу, Россия, Сингапур, АХШ, Таиланд, Чили, Филиппин, Соҕуруу Корея, Япония) уонна Гонконг, Тайвань киирэллэр. Россия 1998 сылтан баар.

Раиса СИБИРЯКОВА, Саха сирэ” хаһыат, edersaas.ru

Хаартыскаҕа: Икки держава салайааччыта хааман иһэн хас да дойду дьылҕатын быһаарыстылар.

+1
0
+1
0
+1
0
+1
0
+1
0
+1
0
+1
0