Бүгүн «Кыһын Саха сириттэн саҕаланар» кыһыҥҥы туризм бэстибээлин түмүктүүр дьоро күҥҥэ «Саха сирин амтана» гастрономия бэстибээлигэр «Атласовтар уһаайбалара» эрэстэрээн кыайыылааҕынан тахсан, Гран-при бирииһинэн наҕараадаланна.
edersaas.ru
Эрэстэрээн шеф-пуобара Николай Атласов Дьокуускай куорат уокуругун дьаһалтатын баһылыга Айсен Николаев анал Кубогынан уонна 50 тыһ. солк. харчынан бириэмийэлэннэ. Сонно тутта Николайы «Саха» көрдөрөр-иһитиннэрэр хампаанньа суруналыыстара тулалыы түстүлэр.
Кыайыы көтөлүн билбит эдэр киһи сирэйдиин-харахтыын сырдаабыкка дылы буолбут. Буолумуна, кини бу Кыайыыга үс сылы быһа бэлэмнэннэ эбээт!
Николайтан, шеф-пуобар киһи санаатыгар, ханнык бүлүүдэлэрэ киниэхэ быйылгы кыайыыны аҕалбыттарын ыйыппыппар, эдэр киһи маннык хоруйдаата:
— Сүрүннээн убаһа этиттэн оҥоһуллубут астарга болҕомтобун уурбутум. Ону тэҥэ быартан уонна сыаттан оҥоһуллубут сүрэх курдук формалаах таҥсык бириэмэни ылбыта.
Уонна, биллэн турар, саамай уустук бүлүүдэ — лабыкта кэмпиэттээх күндүөпкэттэн, чыыртан, атын араас балыгы холбоон оҥорбут «Индигирка» диэн саҥа тоҥ балык бүлүүдэм дьүүллүүр сүбэни соһутта. Ити астар ханна да, кимиэхэ да суох бүлүүдэ көрүҥнэрэ уонна олус уустук үлэлээхтэрин быһыытынан Кыайыыга кынаттаатылар.
Национальнай сиэри-туому, үгэһи тутуһууга, биллэн турар, эмиэ Атласовтарга тэҥнээх суоҕа чахчы. Бүтүн Саха сирин сирэйдээн олорор этнокомплекс бары эрэстэрээннэргэ маастар-кылаастары ыытар таһымнаах буоллаҕа.
Соҕуруу дойду экспертэрэ дьон аһыыр кэмигэр үлэлэрин үгэнэ этэ. Син эмиэ спортка курдук, куонкурус ыытыллар кэмигэр суудьуйалар анал униформаларын кэтэ сылдьаллара, күөн-күрэһи ордук дьыалабыай көрүҥнээбитэ. Ааранан биһиги, суруналыыстар, хас биирдии аһы көннөрү сиэн кэбиспэккэ, аны мантан инньэ сыаналыыр уонна ырытар буоллубут.
Бэҕэһэҥҥи суруйуубар: «Атласовтар уһаайбалара» эрэстэрээн аһын араас көрүҥэ олохтоох эттэн, балыктан, үүттэн, булт аһыттан астанар буолан, аатырыан аатырар эбит! — диэн экспердэр олус сөхтүлэр. Онон бу эрэстэрээн аата «Триумф» спортивнай комплекска ыытыллар «Кыһын Саха сириттэн саҕаланар» тэрээһиҥҥэ дорҕоонноохтук ааттанара буолуо диэн эрэнэбит, » — диэн бэлиэтээбитим, дьэ, туолла. «Атласовтар уһаайбалара» эрэстэрээн — Гран-при хаһаайына!
— Долгуйууу дууһабын кууста. Сыл аайы сайдан иһэр буоллаҕым. Былырыыҥҥыттан ыла күүскэ киирсэргэ санаммытым уонна бүлүүдэлэрим көрүҥнэрин толкуйдаабытынан барбытым. Сөптөөх хайысханы тутустум. Онон бу Кыайыым инники саҕахтарга эрэли үөскэттэ. Салгыы өссө сайдыам, саҥаны эбии айыам. Бу Кыайыыны мин күүппүтүм, эрэммитим. Онон төрөппүттэрбэр уонна кэргэммэр, чугас дьоммор барыларыгар барҕа махтал. Бу биһиги дьиэ кэргэн барыбыт кыайыыбыт! — диэн санаатын үллэһиннэ «Саха сирин амтана» гастрономия бэстибээлигэр Гран-при бирииһинэн наҕараадаламмыт «Атласовтар уһаайбалара» эрэстэрээн шеф-пуобара Николай Атласов.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.