Атырдьах ыйын 1 күнүттэн туйахтаах кыыллары уонна хагдаҥ эһэни бултуурга көҥүлү биэрии саҕаланыаҕа
Бэрт аҕыйах хонугунан атырдьах ыйа буолуо. Ону кытары күһүҥҥү булт сезона аһыллара чугаһыыр. Ол салгына бэлиэр билиннэ. СӨ Айылҕа харыстабылын министиэристибэтин Биологическэй ресурсаларга уонна ураты харыстанарга сирдэргэ-уоттарга дирекциятыгар булка көҥүлү ылааччылар уочараттара үөскээтэ. Ол курдук, уопсай бултуур сирдэргэ көҥүлү ылааччы ахсаана 800-тэн тахсыбыт.
Санатар буоллахха, Дьокуускай куорат Курашов уулуссатын 46-гар атырдьах ыйын 1 күнүттэн туйахтаах кыыллары уонна хагдаҥ эһэни бултуурга көҥүлү биэрии саҕаланыаҕа.
Айылҕа харыстабылын миниистирэ Сахамин Афанасьев бу күннэргэ булчуттары кытта көрсөн, булт сокуонугар туох уларыйыы киирээри турарын кэпсэттэ.
«Булт туһунан сокуоҥҥа булчуттар интэриэстэрэ толору учуоттаныллыбат. Бүгүҥҥү күҥҥэ тустаах сокуоҥҥа уларытыыны киллэрэргэ этии бэлэмнэннэ. Ол курдук, уларытыы быһыытынан, булт көҥүлүн талан ылыы (жеребьевка) киириэҕэ. Кистэл буолбатах, анал лицензияны ылыы уочаратыгар дьоҥҥо элбэх боппуруостар үөскүүллэр. Итини быһаарар инниттэн ол эбэтэр элбэх киһи булт көҥүлүгэр тиксэр саҥа хайысхатын олоххо киллэрэн эрэбит», – диэн Сахамин Миланович быһааран биэрдэ.
* * *
Булт көҥүлүн талан ылыы (сэрэбиэй) Ярославскай, Костромскай уобаластарга уонна Башкортостан Өрөспүүбүлүкэтигэр киирбитэ хас даҕаны сыл буолбут.
Көрсүһүүгэ атырдьах ыйын 1 күнүттэн булт көҥүлүн түҥэтиигэ булчуттар суруммут уочараттара булгуччу тутуһуллуохтааҕа ыйылынна. Итини тэҥэ, тустаах сокуоҥҥа уларытыы киллэриигэ «Байанай» кулууп бэрэстэбиитэллэрэ кытталлара этилиннэ. Саҥа уларыйыы 2018 сылга киириэҕэ.
Александр ТАРАСОВ, «Саха сирэ» хаһыат, edersaas.ru