Халаан уутуттан Абый улууһун авиапорда сабыллыбыта уонча хонно.
Айаннаары сылдьыбыт дьон-сэргэ эрэй бөҕөнү көрөн эрэр. Сөмөлүөккэ билиэттээхтэр кыһалҕаттан 6500 тыһыынча солкуобайы төлөөн бөртөлүөккэ билиэт атыылаһаннар, Муома улууһугар Хонууга көтөллөр. Ол кэнниттэн Белая Гора – Якутск билиэттэринэн Дьокуускайдыылларыгар тиийэллэр. Онон тыа сирин дьоно ороскуот бөҕөҕө тэбиллэн эрэллэр. Билиэт сыаната 23 000-25 000 солк. Ааҕан көрүҥ, биир киһи куоракка барарыгар аҥаардас айаныгар төһө харчыны барыырын. Ортотунан 30000, өссө бу пассажир нэһилиэктэн оройуон киинигэр киирэригэр 2000-5000 солк. төлөөн мотуорунан айанныыр. Бу киһи өссө икки-үс оҕолоох буоллун?! Кинилэр ороскуоттарын эрэйин ааҕан-суоттаан кэбиһиҥ. Харчы кэмчилээн грузовой сөмөлүөккэ 18 тыһ. 500 солкуобайга билиэт ылбыт дьону бөртөлүөккэ чугаһаппаттар даҕаны. Бу туһунан информация ханна да суох. Кыһын, саас устата кырата суох кыһалҕаны көрсүбүт дьоҥҥо тоҕо ким да болҕомтотун уурбатый? Суруналыыстар харахтарын, кулгаахтарын ким эрэ саба бүөлээтэ дуо?
Уу түһэн авиапорт арыллара өссө да ыраах. Кыһалҕалаах куоратчыттартан ким эрэ мунньуммут харчытын сыыһын аҥаардас айаҥҥа ороскуоттаан, ким эрэ барартан аккаастанан, ким эрэ балыыһаҕа киириэхтээх, эмтэниэхтээх кэмин куоттаран эрдэхтэрэ… Куруорка эмтэнэ барыахтаах дьон путевкаларын куоттарымаары, Абыйтан Хонууга диэри мотуорунан 19 чаас устата айаннаан барарга күһэллибиттэрэ. Бэс ыйын 20 күнүгэр диэри Дьокуускайга диэри 24 тыһ.767 солк. суумалаах билиэттээх дьон бэс ыйын 26 күнүгэр Белая Гора – Хонуу – Дьокуускай көппүттэрэ. Манна эбии Дьокуускайтан дьиэлэригэр сайыҥҥы сынньалаҥнарыгар кэлэр устудьуоннар ороскуоттарын санаан кэбиһиҥ. Быһата, сылы быһа үлэлээн муспут уоппускабыт харчыта, профсоюз көрөр бырайыаһын харчыта күдэҥҥэ көттөҕө ол. Айан эрэйин сэргэ, аны куттал диэн баар. Бастакы бөртөлүөт көтөр күнүгэр, порт үлэһитэ үлэтигэр баран иһэн, ууга былдьаммыта. Порка киирэргэ итинник бэйэтэ туспа кутталлаах да, мүччүргэннээх да сырыы буолан турар. Аны уу кэлэ илигинэ, порка киирэргэ массыына эрэ көрдөнөр эбит буоллахпытына, билигин массыына уонна мотуор көрдөнүүтүн аймалҕана. Порка киирэр суол, полоса устун билигин мотуорунан эрэ сылдьыллар. Бөртөлүөт көтөрө, биллэн турар, үчүгэй. Ол эрээри күһүн, кыһын, саас устата кыһалҕа арааһын (халыҥ хаар, киһи-сүөһү өлүүтэ, халаан уута) көрсүбүт Абый улууһун олохтоохторугар айан сыанатын ороскуотун охсубат гына быһыа этилэр буоллаҕа.
Марина ОЧИРОВА, Абый улууһа, Кэбэргэнэ. edersaas.ru сайтка анаан.
