“Хотугу Синергия” форум кыттааччыта кыһынын тоҥмот автостоянка арыйыаҕа
Евсей Анисимов — Хотугулуу-Илиҥҥи федеральнай университет автодорожнай факультетын преподавателэ. Кини үөрэтэр устудьуоннарын кытта кыһыннары массыына тоҥмокко турар инновационнай гарааһын толкуйдаабыт. Эдэр киһи бырайыагынан бу күннэргэ Хаҥалас улууһугар буола турар “Хотугу Синергия” форум “Мин-Инженербин” хайысхатыгар кытта кэлбит. edersaas.ru
— Форумҥа иккис кыттыым буолар. Факультет иһинэн “Автохитинг” диэн устудьуоннарга куруһуоктаахпын. Онно дьарыктанар устудьуоннарбынаан бу бырайыагы хас даҕаны сыллааҕыта толкуйдаабыппыт. Кыһынын массыына сүүрбэт кэмигэр гарааска туруон наада, онтон гараас куортама балай даҕаны сууманы тысхайан ылар. Бу кыһалҕаҕа тирэҕирэн, чэпчэки оҥоһуулаах каркаас систиэмэтинэн тутуллубут сүүрбэ миэстэлээх автостоянка толкуйдаабыппыт. Автодорожнай факультет базатыгар баар. Маннык стоянка хас даҕаны былаана бэлэм баар, үп-харчы көрүлүннэҕинэ олоххо таах киириэ этэ. Куорат иһигэр тимир гарааһы атыыластахха, куортамнастахха хас эмит төгүл үбү-харчыны барыыгын. Аны өссө массыына ходовой чааһа тоҥмотун диэн илдьэ сылдьарга табыгастаах “багаас-гараастары” толкуйдаабыппыт. Бу гарааһы массыына багааһыгар мэһэйэ суох илдьэ сылдьыахха сөп. Кэлин, табылыннаҕына, гараастарбытын патеннатан, докумуоннатыахпытын баҕарабыт.
“Хотугу Синергия” форум иһинэн Уһук Илиҥҥи “Мин-Инженербин” куонкурус иккис түһүмэҕэ ыытылла турар. Биһиги сайтпыт дьоруойа – Евсей бастакы түһүмэҕи ааһан, “Идэтийбит инженер” хайысхаҕа күрэтэһэ сылдьар эбит. Маны таһынан, Саха Өрөспүүбүлүкэтин Бырабыыталыстыбытан граннарын сүүйүөххэ сөп. Евсей граҥҥа тигистэр, толкуйдаабытын олоххо ситэ киллэрэр былааннаах. Эдэр инженергэ ситиһиилэри баҕарабыт!
Манна даҕатан эттэххэ, “Мин-Инженербин” хайысха форумҥа төрдүс сайынын үлэтиир. Быйыл салайааччынан “Сахатранснефтегаз” хампаанньа эдэр үлэһитэ Аркадий Турантаев буолла. Оттон хайысханы Владимир Аммосов бэрэссэдээтэллээх “Мин-Инженербин” уопсастыбаннай тэриллии иилээн-саҕалаан ыытар.
Айтана АММОСОВА, edersaas.ru