Азия дойдуларын физикаҕа XVIII олимпиадатыгар Саха сириттэн үс оҕо кыттыаҕа
Олимпиада ыам ыйын 1-9 күннэригэр Дьокуускай куоракка буолуоҕа. Урутаан эттэххэ, тустаах олимпиада Арассыыйаҕа аан маҥнайгытын ыытыллар. Күн бүгүн 25 дойдуттан 200-тэн тахса оҕо кыттара биллэр. Бу туһунан Азия физикаҕа олимпиадатын (АФО-2017) пресс-сулууспата иһитиннэрэр.
Людмила ПОПОВА, “Саха сирэ” хаһыат, edersaas.ru
Дойду хамаандата Казаньҥа ыытыллыбыт Бүтүн Россиятааҕы физика олимпиадатыгар сүүмэрдэннэ. Ол түмүгэр, атыттары сэргэ, өрөспүүбүлүкэтээҕи интэринээт-лицей 11-с кылааһын үөрэнээччилэрэ Игорь Сивцев, Виктор Решетников уонна Новосибирскайдааҕы судаарыстыбаннай университет анал үөрэтэр-научнай киинин 11-с кылааһын үөрнээччитэ Тимофей Торохов киирдилэр.
Урукку сылларга олимпиада Индонезияҕа, Тайваньҥа, Сингапурга, Таилаҥҥа, Вьетнамҥа, Казахстаҥҥа, Кытайга, Монголияҕа, Израильга буолбута.
“Физикаҕа Азия олимпиадатын ыытар туһунан” СӨ Ил Дархана Егор Борисов 2016 сыл ахсынньы 19 күнүнээҕи дьаһала тахсыаҕыттан, бэлэмнэнии саҕаланан барбыта. РФ Үөрэҕин уонна наукатын министиэристибэтин, ХИФУ өйөбүллэринэн, Москватааҕы физико-техническэй институт (Судаарыстыбаннай университет), СӨ бырабыыталыстыбата тэрийэллэр.
Тустаах күрэхтэһии Азия-Тиихэй акыйаан регионнарын үөрэнээччилэрин ортолоругар физикаҕа сыллата ыытыллар соҕотох интеллектуальнай олимпиада буолар. Норуоттар икки ардыларынааҕы физика олимпиадатын икки ый иннинэ тэриллэр. Хас биирдии дойду 8 оҕону кытыннарар. Күрэхтэһии икки түһүмэхтэн турар: теорияттан уонна экспериментэн. Тэрийээччилэр сорох сылларга олимпиадаҕа бэриллэр садаачалар, норуоттар икки ардыларынааҕы олимпиада садаачаларыттан кытта уустук буолалларын ыйаллар. Ону норуоттар икки ардыларынааҕы олимпиадаҕа Азия дойдуларын регионнара үрдүк көрдөрүүлээхтик кытталлара туоһулуур.
Людмила ПОПОВА, “Саха сирэ” хаһыат, edersaas.ru