Саха ийэлээх, монгол аҕалаах ырыаһыт – Азия көмүс куолаһа, Монголия үтүөлээх артыыската Сарантуяа улахан сольнай кэнсиэрэ Дьокуускайга аан бастаан бу ый 24 күнүгэр Былатыан Ойуунускай аатынан Саха академическай тыйаатырыгар буолуоҕа.
—Ийэм, мин Саха сиригэр, Дьокуускай тыйаатырыгар кэнсиэрдиэхпин куруутун баҕарара. Онон, бу кэнсиэрим – күн күбэй ийэм Татьяна Иннокентьевна сырдык аатыгар ананар.., — диэн истиҥ тылларынан саҕалаата суруналыыстары кытта көрсүһүүтүн Сарантуяа.
Пресс-кэмпириэнсийэни СӨ Суруналыыстарын сойууһун бэрэссэдээтэлэ Галина Бочкарева иилээн-саҕалаан ыытта.
Сарантуяа ийэтэ, Саха сирин Горнай улууһун Мытаах нэһилиэгиттэн төрүттээх Татьяна Иннокентьевна Михайлова – Монголия “Хотугу Сулус” үрдүкү уордьанын кавалера, Монголия бочуоттаах учуутала, үйэтин тухары кэргэнин дойдутугар Монголияҕа, Улан-Батор оскуолаларыгар нуучча тылын учууталынан үлэлээбитэ. Кэргэнинээн Иркутскай куоракка устудьуоннуу сылдьан билсэннэр, 1966 сыллаахха ыал буолбуттар. Бу, Дьокуускайга көрсүһүүгэ, ийэтин кытта Омук тылын институтугар бииргэ үөрэммит дьүөгэлэрэ кэлэннэр, Татьяна Иннокентьевнаны кэриэстээн, иһирэх ахтыылары оҥорон, Сарантуяаны олус долгуттулар…
Сарантуяа – ол аата “лунная заря” диэн өйдөбүллээх эбит. Кырдьык даҕаны, ый курдук сырдаан, сандааран көстөр, кэрэ, күүстээх куоластаах кыыс билигин Монголия биир саамай биллэр-көстөр ырыаһыта – дэлэҕэ даҕаны 1999 сыллаахха Монголия “ХХ үйэ бастыҥ ырыаһыта” үрдүк ааты ылыа дуо?!
Сарантуяа бу иннинэ ийэтин дойдутугар Горнайга, Бэрдьигэстээххэ 2011 сыллаахха Олоҥхо ыһыаҕар сольнай кэнсиэрин оҥорбутун үгүс киһи өйдүүр. 2015 сыллаахха Дьокуускайга Туймаада ыһыаҕын кэнсиэригэр кыттыбыта. Оттон сахалыы ырыаны кини аан бастаан 10 саастааҕар ыллаабыт эбит – саха норуодунай бэйиэтэ Семен Данилов тылларыгар — “Саха үҥкүүтэ”. Сахалыыттан өссө биир сөбүлүүр ырыатынан бэйиэт Иван Федосеев тылларыгар “Сардаана” буолар. Билигин кини репертуарыгар 300-тэн тахса ааптарыскай ырыалаах. Оттон Саха тыйаатырыгар буолар кэнсиэригэр кини ийэтин таптыыр ырыаларын нууччалыы, сахалыы, монголлуу, английскайдыы тылларынан толоруоҕа.
Сарантуяа Арассыыйа-Монголия доҕордоһууларыгар аналлаах декада кэмигэр, Москваҕа, Большой тыйаатырга, Монголия искусствотын маастардарын кэнсиэригэр кыттыбыта, Улан-Удэ куоракка сольнай кэнсиэрэ буолбута. Калмыкияҕа, Элистаҕа кэнсиэрдиир баҕалаах. Кини куолаһын Америкаҕа, Англияҕа, Швейцарияҕа, о.д.а. дойдуларга үрдүктүк сыаналаабыттара.
Биһиги талааннаах биир дойдулаахпыт, эстрада ырыаһыта Улан-Баторга Киин Култуура дыбарыаһыгар дириэктэри солбуйааччынан үлэлиир. Көхтөөх уопсастыбанньык, меценат. Кини Саха сирин кытта сибээһин өссө бөҕөргөтөр баҕалаах.
—Маҥнай миигин ийэм дойдута ситимниирэ, оттон билигин бу сибээһим Өлүөнэ Эбэ курдук кэҥээтэр-кэҥээн иһэр.., — диэтэ кини.
Ырыаһыт айар үлэтин былаанын, саҥа альбомун бэлэмнии сылдьарын кэпсээтэ. Оттон Саха тыйаатырыгар кэнсиэригэр кини доҕотторо – Варя Аманатова, Саарын уонна да атыттар кыттыахтара.
Сарантуяа кэнсиэрэ балаҕан ыйын 24 күнүгэр П.А.Ойуунускай аатынан Саха академическай тыйаатырыгар буолар.
Билиэт Саха тыйаатырын уонна “Киин” киинэ тыйаатырын каассаларыгар атыыланар.
Татьяна МАРКОВА, «Саха сирэ» хаһыат, edersaas.ru