Өрөспүүбүлүкэ үбүн сүрүн сокуонугар бу ый бүтүүтэ уларытыыны киллэриэхтэрэ. Ол чэрчитинэн, ааспыт нэдиэлэҕэ бырабыыталыстыба мунньахтаан быйылгы бүддьүөт дохуоттаах чааһа 917 мөл. солк. эбиллиэҕин эттилэр.
Үп миниистирэ Валерий Жондоров бэлиэтииринэн, бу харчыттан 846,5 мөл. солк. федеральнай бүддьүөттэн хамнас алын кээмэйин үрдэтиигэ кэлбит. Ону таһынан эминэн-томунан хааччыллыыга, уот төлөбүрүгэр кэлэр үбүлээһин эбиллибит. Ороскуот туһунан эттэххэ, хамнаһы үрдэтиигэ 1,78 млрд солк. эбии көрүллүөҕэ. “Бүддьүөт үлэһиттэрин хамнастарын, хамнас алын кээмэйин үрдэтиигэ барыта 12,2 млрд солк. барыаҕа”, — диэн бэлиэтиир Валерий Алексеевич.
Итини таһынан, халаан уутун содулун туоратыыга өрөспүүбүлүкэ хаһаас фондата 300 мөл. солк. диэри улаатыаҕа. Тулаайах оҕолору дьиэлээһиҥҥэ эбии 100 мөл. солк. барыаҕа. Ону сэргэ, Дьокуускай куорат 35-с нүөмэрдээх оскуолатын тутуутугар, 27-с нүөмэрдээх оскуолатыгар эбии кылааһы оҥорууга, Аллараа Бэстээх биэрэгин бөҕөргөтүүгэ үбүлээһин көрүлүннэ.
Онон үп сүрүн сокуонугар саҥа уларытыылары киллэриинэн, бүддьүөт дохуоттаах чааһа 193 млрд 951 мөл. солк. буолуоҕа. Ороскуоттаах чаас – 195,6, дэписиит – 1,8 млрд солк. тэҥнэһиэҕэ. Сокуон барыла Ил Түмэҥҥэ киирдэ, дьокутааттар сотору кэминэн сиэссийэлэригэр көрүөхтэрэ.
Аграфена КУЗЬМИНА, «Саха сирэ» хаһыат, edersaas.ru