Бүгүн 310 м горизоҥҥа быыһааччылар кыайан киирбэтилэр

Бөлөххө киир:

Бүгүн сарсыарда аҕыс чаастааҕы дааннайынан, быыһааччылар “Мир” рудник шахтатыгар 310 миэтэрэ дириҥҥэ кыайан киирбэтилэр. Шахтаҕа уу таһыма биир миэтэрэттэн ордук таҕыста. Бу туһунан “АЛРОСА” хампаанньа пресс-сулууспата иһитиннэрэр.

Онон оперативнай ыстаап быһаарыытынан, быыһааччылар бүгүн 310 хаттыгаска (горизоҥҥа) үлэни тохтоттулар. Шахтердарга баар электроннай бэлиэлэринэн, быһа холуйан, бу кэрдиискэ сүппүт дьонтон 4 киһи баара биллибитэ. Онон бүгүн бары күүһү ууран туран, 210 м кэрдиискэ баар бөҕү-саҕы ыраастыахтара. Көрдөөһүн тохтотуллубат.

Ыспыраапка быһыытынан эттэххэ, шахта үс сүрүн кэрдиистээх: 210, 310, 410. Дьону көрдөөһүҥҥэ шахтердартан ураты альпинистар, водолазтар көмөҕө кэлбиттэрэ. Билигин 210 м хаттыгаска ууну хачайдыыр үс носуос турар. Бэҕэһээ Мирнэйгэ “АЛРОСА” хампаанньа бастакы вице-премьерэ, толорор дириэктэр Игорь Соболев бэлиэтээбитинэн, рудникка уу чааска 1200 куб м тиийэ кэлэр. Бу кэлбит ууну үс носуос хачайдаан иһиэхтээҕэ.

Аграфена КУЗЬМИНА.

+1
0
+1
0
+1
0
+1
0
+1
0
+1
0
+1
0