Бүгүн, аны, күн өлөр

Бөлөххө киир:

Соторутааҕыта Ыйбыт “өлөн”, кытаран-көҕөрөн соһуппут буоллаҕына, аны, олунньу 15 күнүгэр күн өлөр. Ол эрээри бу сырыыга күн өлүүтэ толору буолбат, сороҕо эрэ сабыллыаҕа. Дьокуускай бириэмэтинэн түүн 3 чаас 55 мүнүүтэҕэ саҕаланан баран, сарсыарда 8 чаас 47 мүнүүтэҕэ бүтэр. Ону даҕаны, Антарктида, Соҕуруу Америка диэки көстүөхтээх.

“Күн өлүүтэ” диэн үс халлаан эттигэ биир көнөҕө турдахтарына, Ый күлүгэ Сиргэ түһэн, Күнү мэһэйдээн кэбиһэрин ааттыыллар. Бу маннык көстүү саҥа ый үүнэр кэмигэр эрэ буолар кыахтаах. Сыл устата иккитэ эрэ буолуон сөп.

Тохсунньу 31 күнүгэр Ый өлбүтүн кэнниттэн бу Күн өлүөр диэри кэрчик кэми “коридор затмений” диэн ааттыыллар. Бу кэмҥэ киһи дьылҕатын уларытар дьикти түгэннэр үөскүөхтэрин сөп. Холобур, этиспит киһигин кытары өр кэмҥэ өстөһүөххүн сөп. Оттон үтүөнү түстээбитиҥ сылы быһа үтүөнэн дьайа сылдьыа. Ол гынан, эргэни урукку олоххо хаалларан, ыраастанан баран, сыалы-соругу чопчуланан, уларыйыылары, саҥа сүүрээннэри, саҕалааһыннары киллэрэргэ тоҕоостоох кэм эбит. Элбэххэ аралдьыйбакка, биир хайысханы тутустахха, үтүө түмүктээх буолар.

Ону тэҥэ, олунньу 16 күнүгэр, халлааҥҥа саҥа Ый үүнэрин даҕаспытынан, Илиҥҥи Саҥа дьыл буолар. Ыт сыла, дьэ, үүнэр!. Кытайга, Гонконга, Малайзияҕа бу күнү олус күүтэллэр, эрдэттэн бэлэмнэнэллэр, ону ааһан, ыйы быһа бырааһынньыктыыллар. Холобур, бу күн Баай-дуол Таҥаратын көрсөр туому толороллор, оччоҕо сылы быһа уйгу-быйаҥ тумнубат диэн итэҕэйэллэр. Күн өлөр кэмэ киһиэхэ күүстээх дьайыылаах буоллаҕына, бу Саҥа дьыл үүнэр эниэргийэтин кытары холбоһон, өссө күүһүрэр үһү. Онон бу күннэр ураты күүстэрин сатаан сөпкө туһаныҥ диэн астрологтар сүбэлииллэр.

Илиҥҥи Саҥа дьылы хайдах көрсөр туһунан edersaas.ru сайтка сарсыҥҥы матырыйаалы ааҕаарыҥ.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0