СӨ Ил Дархана Егор Борисов Ыйааҕынан, ахсынньы 5 күнэ Оҕо тэрилтэлэрин хамсааһыннарын күнүнэн 2014 сыллаахха биллэриллибитэ. Бу — оҕо тэрилтэлэрин хамсааһыннарын өйүүр, сайыннарар сыаллаах Саха сиринээҕи оҕолор уопсастыбаннай холбоһуктарын Сойууһа төрүттэммит күнэ (1992 сыл ахсынньы 5 күнэ)
Бу күн өрөспүүбүлүкэ бары улуустарыгар, куораттарыгар араас бырааһынньыктааҕы тэрээһиннэр, көрсүһүүлэр, кэнсиэрдэр буолаллар. 1992 сылтан саҕалаан, үүнэр көлүөнэни патриотизм тыыныгар иитэр сыаллаах, пионердар хамсааһыннарын үтүө үгэстэрин салгыыр өрөспүүбүлүкэҕэ оҕо уопсастыбаннай холбоһуктарын тэрийии киэҥ далааһыннаах үлэтэ саҕаламмыта. Маны тэрийбит, көҕүлээбит дьонунан Татьяна Ильина, Нина Барашкова, Нина Протопопова, Александр Васильев, Варвара Хингеева, Людмила Мыреева о.д.а. буолаллар. Кинилэр көмөлөрүнэн “Эркээйи” бырагыраама, “Оҕо быраабын туһунан” СӨ сокуона, “СӨ оҕо уопсастыбаннай холбоһуктарын судаарыстыбаттан өйүүр туһунан” Бырабыыталыстыба Уурааҕа, СӨ Үөрэх тэрилтэлэрин оҕо уопсастыбаннай тэрилтэлэрин сайдыытын кэнсиэпсийэтэ ылыллыбыттара.
“Дьулуур” оҕо биир сомоҕо хамсааһынын бэрэссэдээтэлэ, “Арассыыйатааҕы үөрэнээччилэр хамсааһыннара” уопсастыбаннай судаарыстыбаннай тэрилтэ Саха сиринээҕи салаатын бэрэссэдээтэлэ Геннадий Охлопков:
—Өрөспүүбүлүкэ таһымнаах икки нэдиэлэлээх декада биллэрбиппит. Үбүлүөйдээх сылы түмүктүүр үөрүүлээх тэрээһиммит бүгүн Оҕо айымньытын дыбарыаһыгар күнүс 16 чаастан буолар. Манна Саха сирин 22 улууһуттан кытталлар. “Бэс Чагда” сынньанар, доруобуйаны бөҕөргөтөр кииҥҥэ “Оҕо быраабын көмүскүүбүт”, “Чөл олох”, “Оҕо уопсастыбаннай тэрилтэлэрэ” анал симиэнэҕэ 150-ча оҕо кэлэн кытта сылдьар. Быйыл тэрилтэбит 25 сыллаах үбүлүөйэ. Бэлиэ сылы түмүктүүр күммүтүгэр өрөспүүбүлүкэ, Арассыыйа, норуоттар икки ардыларынааҕы таһымнаах тэрээһиннэргэ миэстэлэспит лидер оҕолору, оҕо уопсастыбаннай тэрилтэлэрин, оҕо тэрилтэлэрин салайааччыларын чорботон, 10 лауреаты бэлиэтиэхпит.
Людмила ПОПОВА, “Саха сирэ” хаһыат, edersaas.ru
Хаартыскаҕа Айаал ЧЕРНОГРАДСКАЙ түһэриитэ.