Ытыктабыллаах Саха сирин олохтоохторо!
Эһигини Саха Өрөспүүбүлүкэтин Ил Түмэнин уонна Олонхо Уон сылын тэрийэр Саха Өрөспүүбүлүкэтин Национальнай кэмитиэтин аатыттан Олоҥхо күнүнэн эҕэрдэлиибин!
Сахалар, биһиги, үгүс үйэни уҥуордаан, олоҥхобутун балайда чөл туруктаах, өбүгэлэрбит хайдах ыллаабыттарынан-туойбуттарынан, кэс тыллаах хаалларбыттарынан бүөбэйдээн, харыстаан илдьэ сылдьабыт. ЮНЕСКО тэрилтэтэ 2005 с. олоҥхону аан дойду норуоттарын тылынан уус-уран бастыҥ айымньытынан биллэрбитэ. Ол кэмтэн ыла олоҥхону харыстааһыҥҥа, үөрэтиигэ, тарҕатыыга анаан-минээн ылсыһан үлэ саҕаламмыта. Олоҥхону хомуйууга, тылбаастааһыҥҥа, тарҕатыыга, аныгы технология көмөтүнэн үйэтитиигэ бастакы олуктары уурдубут.
Быйылгы сыл бэлиэ тэрээһинигэр — «Олоҥхо дойдутугар аан дойду норуоттарын эпостара» II норуоттар икки ардыларынааҕы эпическэй форумҥа ЮНЕСКО генеральнай дириэктэрэ Ирина Бокова, аан дойду бөдөҥ эпосоведтара, учуонайдара, тас дойдулартан, Россия регионнарыттан эпоһы толорооччулар кыттыыны ылыллар. Бу сайын Олоҥхо ыһыаҕа сахалартан бастакы композитор Марк Жирков, олоҥхоһуттар Семен Каратаев-Ырыа Дыгыйар, Василий Каратаев, Семен Иванов төрөөбүт-үөскээбит түөлбэлэригэр — Бүлүүгэ үрдүк таһымнаахтык ааста. Кэлэр 2018 сылга XII Олоҥхо ыһыаҕа Алдан улууһугар ыытыллыаҕа. Олоҥхо ыһыаҕа Россия таһымыгар тахсан, Алдан сиригэр Уһук Илин федеральнай уокуругун субъектарыттан ыалдьыттар кэлиэхтэрэ, норуоттар доҕордоһууларын түһүлгэтэ түстэниэҕэ.
Олоҥхо Национальнай кэмитиэтэ, “Олонхо” ассоциацията олоҥхо эйгэтин кэҥэтиигэ, ол иһигэр саха оҕотугар өбүгэлэрин үгэстэрин иҥэриигэ утумнаахтык үлэлэһэллэр. «Олоҥхо» ассоциацията уопсастыбаннай тэрилтэлэри, олоҥхону ыччакка тарҕатааччылары — оҕо саадтарын иитээччилэрин, оскуола учууталларын, биирдиилээн ааттара-суоллара киэҥник биллибэт, ол эрээри норуот үгэстэрин илдьэ сылдьар дьону түмэн, олоҥхону үйэтитиигэ үгүс үлэни ыытар. Кинилэргэ Олоҥхо Национальнай кэмитиэтиттэн барҕа махталбытын биллэрэбит. Олоҥхону үөрэтиигэ, тарҕатыыга үлэ ис хоһооно салгыы байытыллар.
Олоҥхо тылын, төрүт үгэстэрбитин билии билиҥҥи сайдыылаах кэмҥэ олох ханнык баҕарар эйгэтигэр үлэлииргэ, үөрэнэргэ, биһиги бөҕө тирэхтээх буоларбытыгар көмөлөөх буолуоҕа.
Күндү Саха сирин олохтоохторо! Өбүгэлэрбит кэс тылларын энчирэппэккэ, төрүт култуурабытын харыстаан, байытан, кэнэҕэс кэнчээригэ чөл тириэрдэрбитигэр төһүү күүс буолуоҕуҥ! Төрөөбүт дойдубут чэчириирин туһугар үүнэ-сайда туруоҕуҥ!
Саха Өрөспүүбүлүкэтин Ил Түмэнин Бэрэссэдээтэлэ, Олоҥхо Уон сылын бэлэмнээн ыытар Саха Өрөспүүбүлүкэтин Национальнай тэрийэр кэмитиэтин Бэрэссэдээтэлэ Александр Жирков.