Култууралар күндү алмаастыы сандааран…
Бүгүн Бүтүн Россия үрдүнэн Култуура үлэһитин күнэ бэлиэтэнэр. Ол чэрчитинэн, бэҕэһээ, кулун тутар 24 күнүгэр А.Пушкин аатынан Нуучча академическай тыйаатырыгар киэҥ далааһыннаах бырааһынньыктыы тэрээһин ыытылынна.
Татьяна Маркова, «Саха сирэ» хаһыат, edersaas.ru
Бу күн, сыл устата өрөспүүбүлүкэҕэ бастыҥ ситиһиилэрдээх култуура уонна искусство кэлэктииптэрин чиэстээтилэр.
Быйыл үбүлүөйдээх даатата бэлиэтэнэр саха аатырбыт композитора Марк Жирков айымньылаах үлэтигэр аналлаах медиа-быыстапка үлэлээтэ.
Күнүс Өрөспүүбүлүкэ саалатыгар 25 култуура деятелигэр судаарыстыбаннай наҕараада туттарылынна.
Аан бастакы “Көлүөнэлэр көрсүһүүлэрэ” диэн култуура бэтэрээннэрин уонна эдэр исписэлиистэрин форумнара бэрт үчүгэй тэрээһиннээхтик ааста, интэриэһинэй бырайыактар оҥоһуллан таҕыстылар.
Былырыын Култуура уонна духуобунай сайдыы министиэристибэтэ, норуот духуобунаһын туһугар бэйэни харыстаммакка үлэлээһини, талан ылбыт идэҕэ муҥура суох бэриниилээх буолуу чаҕылхай холобурун көрдөрүүнү билинии уонна ытыктабыл бэлиэтин – “Саха Өрөспүүбүлүкэтин култууратын уонна искусствотын бочуоттаах үлэһитэ” бэлиэни олохтообута.
Култуура үлэһитин күнүгэр бу бочуоттаах бэлиэнэн бастыҥтан-бастыҥнар, өрөспүүбүлүкэ култууратын историятыгар ааттара кыһыл көмүс буукубаларынан суруллар дьоннор наҕараадаланаллар.
Холобур, 2016 сыллаахха Бочуоттаах бэлиэ бастакы хаһаайыттарынан бары билэр, ытыктыыр дьоммут – Андрей Саввич Борисов, Борис Федорович Неустроев-Мандар Уус, Василий Павлович Винокуров-Кыталык, Владимир Васильевич Ксенофонтов, Данил Иванович Николаев, о.д.а. буолбуттара.
Оттон быйыл, 2017 сылга, култуураҕа, искусствоҕа өр сыллаах айымньылаах, бэриниилээх үлэлэрин иһин “Саха Өрөспүүбүлүкэтин култууратын уонна искусствотын бочуоттаах үлэһитэ” бэлиэнэн Василий Степанович Парников – “Кэнчээри” РФ үтүөлээх, СӨ норуодунай кэлэктиибин салайааччы, Раиса Реасовна Кулаковская — “Доҕордоһуу” заповедник-мусуой тэрийээччитэ уонна духуобунай лиидэрэ, Аграфена Дмитриевна Макарова – Саха сиринээҕи Култуура уонна искусство колледжын уус-уран салайааччыта, бу, тыа сирин култууратыгар бастыҥ каадырдары бэлэмниир үөрэх кыһатын саҥа таһымҥа таһаарбыт салайааччы, Николай Николаевич Попов – А.С.Пушкин аатынан Нуучча академическай тыйаатырын сүрүн худуоһунньуга, Валентина Андреевна Самсонова – СӨ Национальнай библиотекатын саҥа таһымҥа таһаарбыт киһи, Юнона Михайловна Упхолова – В.А.Босиков аатынан Муусука Үрдүкү оскуолатын преподавателэ, Юрий Егорович Платонов – эстрада бэтэрээнэ, М.К.Аммосов аатынан ХИФУ профессора, Юрий Васильевич Спиридонов – худуоһунньук, “Үргэл” Арт-галерея дириэктэрэ, Гаврил Григорьевич Софронов — Култуура уонна искусство колледжын бэтэрээнэ, Василиса Егоровна Романова — “Эркээни эдэр сааһа” норуодунай үҥкүү ансаамбылын салайааччы, наҕараадаланнылар.
Ити курдук, Тоҕус хаттыгастаах мэҥэ халлаан уонна искусство Тоҕус хайысхатын ыйар Тоҕус салаалаах бэлиэни дьоһуннаах дьонугар туттаран туран, биир идэлээхтэрин СӨ култууратын, духуобунай сайдыытын миниистирэ Владимир Тихонов истиҥник эҕэрдэлээтэ.
Бары наҕараадаламмыттарга уонна ыалдьыттарга “Кыталык” РФ үтүөлээх, СӨ норуодунай үҥкүү кэлэктиибэ, “Виртуозы Якутии” скрипачтар ансаамбыллара, “Гулун” норуодунай ансаамбыл, “Айархаан” бөлөх, “Сюрприз” норуодунай үҥкүү ансаамбыла, Г. Кривошапко аатынан Судаарыстыбаннай филармония артыыстара, о.д.а. бэйэлэрин бастыҥ мусукаалынай эҕэрдэлэрин бэлэхтээтилэр.
Бырааһынньык “Имя культуры” диэн иккис түһүмэҕэр маннык ааттаах өрөспүүбүлүкэтээҕи уопсастыбаннай куонкурус түмүктэрин таһаарыы сиэрэ-туома үөрүүлээхтик ыытылынна.
Татьяна Маркова, «Саха сирэ» хаһыат, edersaas.ru