Турцияҕа буола турар Сурдлимпийскай оонньууларга көҥүл тустууга Арассыыйа чиэһин көмүскээбит биир дойдулаахтарбыт Егор Скрябин уонна Валерий Чемпосов ыйааһыннарыгар бэһис буоллулар. Бөҕөстөрбүт боруонса мэтээлгэ биир хардыы тиийбэтилэр.
57 киилэҕэ диэри ыйааһыҥҥа Егор Скрябин Исмаил Бостанкины (Турция) 10:4 ахсаанынан хотон баран, салгыы иранец Кейван Ростамбадига (8:14) баһыйтарда. Онтон, Иран бөҕөһө финалга тахсыбытынан, салгыы тустар быраабы ылан, Айбек Рыспяковы (Кыргызстан) кытта сындалҕаннаах киирсиигэ кыайыылаах таҕыста. Боруонса мэтээли былдьаһыыга Армения тустуугун хаачыстыбанан баһыйан иһэн, тиһэх сөкүүндэлэргэ очукуо биэрэн кыһыылаахтык хотторон кэбистэ.
Валерий Чемпосовпыт 65 киилэҕэ диэри ыйааһыҥҥа бастаан Яхунл Цывинскийы (Белоруссия) 12:1, онтон Шадияр Пернешаны (Казахстан) 4:0 ахсаанынан баһыйа тутаттаата. Ол эрээри эмиэ Иран бөҕөһүн Хусейн Нуридашейхуны утары тугу да оҥорбото, 0:6 ахсаанынан хоттордо. Салгыы үһүс бириистээх миэстэни Онур Арины (Турция) кытта былдьаһыыга бастакы түһүмэххэ 1:0 ахсаанынан чорбойон иһэн, иккис түһүмэххэ утарылаһааччытын кимиитин тулуйумуна, 14:3 ахсаанынан баһыйтарда.
Саха сирин хамаандатын кылаабынай тириэньэрэ Василий Стручков “Спорт Якутии” таһаарыыга биэрбит интервьютугар уолаттар кыахтарынан тустубуттарын, арай күрэхтэһии күүрээнин уйбатахтарын эттэ.
Оттон бүгүн, от ыйын 26 күнүгэр, Василий Стрекаловскайбытыгар бары биир киһи курдук ыалдьабыт. Уус Алдантан төрүттээх Арассыыйа чөмпүйүөнэ 70 киилэҕэ диэри ыйааһыҥҥа Дьокуускай бириэмэтинэн 20:00 чааска туста тахсар.
Роман ПОПОВ, “Саха сирэ” хаһыат, edersaas.ru