“Том и Джерри” оҕо-аймах сөбүлүүр мульткиинэтэ экраҥҥа аан бастаан олунньу 20 күнүгэр 1940 сыллаахха тахсыбыт. Бу аан дойду оҕото таптаабыт мульткиинэтин Америка аниматордара Уильям Ханна (мультипликатор, режиссер) уонна Джозеф Барбера (аниматор, режиссер) толкуйдаабыттар.
Том бастаан Джаспер, онтон Джерри (Джеральд Маус) Мышь уонна Джинкс диэн ааттаахтар эбит. Элбэх сиэрийэлээх мульткиинэ 1940 сылтан 1958 сылга диэри MGM диэн Голливуд устуудьуйатыгар уһуллубут. 1961 сыллаахха MGM быраабын Джин Дейч салайар Рембранд Филмс диэн Прага устуудьуйатыгар атыылаабыт. Бу устуудьуйа 13 сиэрийэни салгыы таһаарбыт. Ол гынан баран, бу тахсыбыт сиэрийэлэр мульткиинэлэр устуоруйаларыгар саамай табыллыбатаҕынан ааҕыллыбыттар. Онтон 1963 сыллаахха мульткиинэ Голливудка Чак Джонс устуудьуйатыгар тахсыбыт. «Сиб-Тауэр 12 Продакшнс» 1967 сылга диэри салҕаабыт. Онтон кэлин бу мульткиинэни төрүттээбит дьон бэйэлэрэ ылан салгыы үлэлэспиттэр (1975-1977; 1990-1993 сс.) Кэлин Фильмэйшен Студиос 1980-1982 сс.таһаарбыт.
Манна даҕатан эттэххэ, “Том уонна Джерри” 1940-1958 сс. тахсыбыт мульткиинэлэрэ саамай бастыҥынан билиниллибиттэр, Оскар бириэмийэтин сэттэтэ ылбыттар.
Биһиги корр., “Саха сирэ” хаһыат.
+1
+1
+1
+1
+1
+1
+1