Саха сирин филармонията бүгүн, балаҕан ыйын 12 күнүгэр, 1N-дээх Оҕо искусствотын оскуолатыгар (ДШИ, Ярославскай уул., 27) 18:30 чаастан Саха сирин уонна Россия биллиилээх композитора Владимир Ксенофонтов 70 сааһыгар аналлаах Улахан кэнсиэргэ ыҥырар!
Марк Жирков аатынан Дьокуускайдааҕы Музыкальнай колледж преподавателэ, Василий Босиков аатынан Саха сиринээҕи Музыка Үрдүкү оскуолатын доцена Владимир Васильевич Ксенофонтов араас жанрга чаҕылхай музыкальнай айымньылара өрөспүүбүлүкэ эрэ буолбакка, бүтүн Россия итиэннэ тас дойдулар музыкаҕа сүгүрүйээччилэрин, специалистарын үрдүк сыанабылларын, билиниилэрин ылаллар.
Кэнсиэргэ филармония айар кэлэктииптэрэ – “Symphonica ARTica” оркестр, дирижер Наталья Базалева, “Lena River Brass” духовой оркестр, дирижер П.Васьковскай, “Arco Artico” струннай квартет, салайааччы А.Дедюкин, Суорун Омоллоон аатынан Опера уонна балет тыйаатырын солистката Екатерина Захарова, Музыка Үрдүкү оскуолатын устудьуоннара кыттыахтара.
Үбүлүөйдээх кэнсиэр бырагырааматыгар композитор “Аал-Луук Мас” симфоническай оркестрга аналлаах үс түһүмэхтээх симфонията, М.К.Аммосовка аналлаах “Бастаан иһэри ыталлар” (М.Тимофеев тылларыгар) реквием-балладата, онтон да атын биллэр-көстөр айымньылара киирдилэр.
Татьяна Афанасьева, «Саха сирэ» хаһыат, edersaas.ru