Кулун тутар 1 күнүттэн Саха сиригэр «Олох олорор дьолбор махтанабын!» («За счастье жить благодарю!») социальнай акция саҕаланна. Акция соруктарыттан биирдэстэринэн, өрөспүүбүлүкэ быраастарын уонна медицина үлэһиттэрин рейтинин үрдэтии буолар.
Надежда ЕГОРОВА, «Саха сирэ» хаһыат, edersaas.ru
Саамай элбэх махталы ылбыт быраастары уонна медицинскэй үлэһиттэри быһаарар акция муус устар 1 күнүгэр диэри ыытыллар.
Акцияҕа кыттыан баҕалаах ханнык баҕарар киһи бэйэтин истиҥ махталын сөбүлүүр эмчитигэр аккырыыккаҕа суруйан тириэрдэр кыахтанар. «За счастье жить благодарю!» диэн анал суруктаах аккырыыккалары Арассыыйа почталарын отделениеларыгар толоруохха уонна анал дьааһыктарга түһэриэххэ сөп.
Акция хайдах ыытылларын туһунан олунньу 27 күнүгэр өрөспүүбүлүкэтээҕи медиа-кииҥҥэ «төгүрүк остуолга» кэпсэттилэр. Манна бырайыагы тэрийээччилэр: Дьокуускайдааҕы 3 №-дээх балыыһа кылаабынай бырааһа, Саха сиринээҕи Медицинскэй балаата бэрэссэдээтэлэ Светлана Давыдова, «Сахамедиа» генеральнай дириэктэрин солбуйааччы Афанасий Ноев, Арассыыйа почтатын дириэктэрэ Алевтина Игнатьева уонна куорат балыыһаларын, доруобуйа харыстабылын быраастара, тэрийээччилэрэ кытыннылар.
Светлана Давыдова иһитиннэрбитинэн, үтүө санаа маннык дьаһала ыытылларын нэһилиэнньэ олус биһириир уонна наадыйар. Ыарыһахтар үгүстэрэ эмтэммит быраастарыгар быыс булан махтаммакка хаалаллара баар суол. Онон, кини маннык акцияҕа кыттан, кэмигэр этиллибэккэ хаалбыт истиҥ тылларын суруйан, махталын тириэрдэр.
Акцияны ыытарга «За счастье жить благодарю» диэн суруктаах 10 тыһыынча курдук аккырыыкка бэлэмнэнэн, өрөспүүбүлүкэ почталарын сибээстэригэр тарҕатылынна.
«2013 с. ыытыллыбыт бастакы акцияны олус элбэх киһи биһирээбитэ, 5 тыһыынча киһи кыттыбыта. Бэл, атын регионнар (ол иһигэр, Смоленскай уобалас) биһиги холобурбутун батыспыттара. Быйыл эмиэ ыытан эрэллэр. Бастакы акция ситиһиилээхтик ааспытын билэбит, быйыл даҕаны улахан кыһалҕаны көрсүөхпүт дии санаабаппыт. Почталарбыт начаалынньыктара (почта 2,5 тыһыынча курдук үлэһиттээх) үлэ хаамыытын барытын билэн олороллор», – диэн Алевтина Ивановна «бойобуой бэлэмнээх» олороллорун туһунан кэпсээтэ.
Акция туох соруктааҕый?
«Төгүрүк остуолга» кэлбит хас биирдии кыттааччы үтүө санаа акциятын суолтатыгар уонна наадатыгар бэйэтин санаатын үллэһиннэ. «Фтизиатрия» НПК дириэктэрэ Александр Кравченко быраас уонна ыарыһах ики ардыгар истиҥ уонна өйдөһөр сыһыан баар буоллаҕына эрэ, ыарыһах түргэнник үтүөрэрин холобурдаата.
Дьокуускай к. инбэлииттэрин уопсастыбатын бэрэссэдээтэлэ Екатерина Емелина уопсастыба 2,5 тыһыынча курдук чилиэнэ акцияҕа кыттарыгар бигэ эрэллээх. «Үрүҥ халааттаах аанньал бэйэтин үлэтин толорорун сэргэ, эйиэхэ киһилии сыһыаннаһар, истиҥ мичээрин бэлэхтиир буоллаҕына, түргэнник үтүөрүөххэ сөбүн бэйэбинэн билэбин», – диэтэ.
Биллэрин курдук, кэнники кэмнэргэ ыарыһахха көмөҕө кэлбит эмчиттэргэ саба түһүү, кырбааһын түгэннэрэ элбээтилэр. СӨ Доруобуйа харыстабылын министиэристибэтин пресс-сулууспатын исписэлииһэ Назар Аммосов 10 түгэн тахсыбытын ахтан аһарда. Онуоха ардыгар сонуну киэҥник тарҕатар сириэстибэлэр «хаһыытыыр-ыһыытыыр» төбөлөөх ыстатыйалары таһаараллара, быраастар буруйдаахтарын эрэ курдук иһитиннэриилэри оҥороллоро нэһилиэнньэҕэ охсуулааҕын тоһоҕолоон бэлиэтээтэ. Кини этиитин искэн өрөспүүбүлүкэтээҕи диспансерын кылаабынай бырааһын солбуйааччы Туяра Белолюбская: «Биһиги диспансербытыгар хас биирдии быраас ыарахан ыарыһахтары кытары үлэлиир. Быраас хас биирдии ыарыһах доруобуйатын туһугар улахан эппиэтинэһи сүгэрин, бэйэтин харыстаммакка үлэлиирин нэһилиэнньэ өйдүөн наада», – диэн үөһээ этиллибит санааҕа сөбүлэһэрин туһунан эттэ.
РФ педиатрдарын сойуустарын Саха сиринээҕи отделениетын сэкирэтээрэ Людмила Маринова нэһилиэнньэҕэ ыыппыт ыйытыктарын түмүктэрин билиһиннэрдэ. Ыйытык түмүгэр биллибитинэн, ыарыһах үксүгэр эмтээһин хаачыстыбатын эрэ буолбакка, быраас киниэхэ сыһыанын үрдүктүк сыаналыыр. Онон, маннык акция эдэр исписэлиистэри эмиэ үчүгэй быраас буоларга көҕүлүүр.
Харах өрөспүүбүлүкэтээҕи балыыһатын кылаабынай бырааһа Анатолий Назаров бырайыак ааптардарыгар, тэрийээччилэригэр махтанна. «Үрүҥ халааттаах аанньал ыарахан үлэтиттэн быыс булан, ханнык да наҕарааданы, ааты-суолу эккирэтиспэт, бэйэтин туһугар сүүрбэт-көппөт, үксүгэр күлүккэ хаалан хаалар. Киниэхэ, кылаабынайа – ыарыһаҕын махтала. Ону таһынан, дойдуга эмчиттэргэ сыһыан уларыйан, араас хомолтолоох түбэлтэлэр тахса турар кэмнэригэр бу акция саамай наадалаах уонна кэмигэр ыытыллан эрэр», – диэн өрөспүүбүлүкэ олохтоохторо акцияҕа көхтөөхтүк кытталларыгар баҕа санаатын тириэртэ.
Надежда ЕГОРОВА, «Саха сирэ» хаһыат, edersaas.ru