Балаҕан ыйын 10 күнүгэр, хаһан даамбаны оҥорон бүтүөхтэригэр диэри кирдээх уу иккис, үһүс долгуна Иирэлээх, Оччугуй Ботуобуйа уонна Бүлүү өрүскэ түһүөҕэ. Билигин кирдээх уу бастакы долгуна Ньурба куорат аннынан бара турар. Ыксаллаах быһыы-майгы тахсан, Сунтаар уонна Ньурба улууһун олохтоохторун ыраас уунан хааччыйыы, ууну өрүстэн буолбакка, атын сиртэн ылыы тэрилиннэ.
edersaas.ru
«Айылҕа харыстабылын Мииринэйдээҕи инспектордара дренажнай котлованнар кирдээх ууну Иирэлээххэ тоҕоллорун видеоҕа устубуттар. Ону мин аак оҥорорго сорудах биэрдим. Онон иккис долгун Бүлүүчээҥҥэ тиийиэҕэ. Балаҕан ыйын 10-гар, Иирэлээх полигона оҥоһуллан бүтүөр диэри кирдээх уу иккис, үһүс долгуна кэлиэҕэ» — диэн эттэ Саха сирин экологияҕа миниистирэ Сахамин Афанасьев.
Ил Дархан э.т. Айсен Николаев бүгүн, атырдьах ыйын 30 күнүгэр киртийбит өрүстэри бөртөлүөтүнэн кэрийэн көрдө. Сунтаарга сүбэ мунньах кэмигэр АЛРОСА хампаанньа кылгас кэм иһигэр дражнай полигоннары чөлүгэр түһэрэригэр, гидротехническэй тутууну бэрэбиэркэлииригэр, инникитин итинник саахал тахсыбатын туһугар үлэлииргэ ыҥырда.
ОДьКХ министиэристибэтигэр уонна Бүлүү бөлөх улуустарын дьаһалталарыгар нэһилиэнньэни ыраас уунан хааччыйарга, хаһаайыстыбаҕа атын ууну туттарга, ону сэргэ, бодобуостар үлэлэрин сөргүтэргэ сорудахтаата.
Айсен Николаев бу эҥээр ынах-сүөһү үүтүн, этин аска туттар төһө сэрэхтээҕин кытаанахтык бэрэбиэркэлиир, 16 нэһилиэнньэлээх пуун доруобуйатын туругун кэтээн көрөр, ким туга ыалдьыбытын бэлиэтиир наадалааҕын эттэ. Олохтоохтор хороҕор муостааҕы өрүскэ уулата киирэртэн туттуналларыгар сүбэлээтилэр.
Мунньах түмүгэр Саха сирин экологияҕа миниистирэ Сахамин Афанасьев «АЛРОСА» хампаанньа Бүлүү эбэни киртиппит хоромньутун толуйарыгар, ночоотун төлүүрүгэр, экосистематын чинчийэригэр этии киллэрдэ.
Марианна Тыртыкова, «Саха сирэ», edersaas.ru