Сэтинньи 28 күнүгэр «Илин» космодромтан ыытыллар «Метеор-М» аргыстаах «Союз-2.1б» аракыата Бүлүү улууһугар түспүт чаастарын көрдөөһүҥҥэ бэлэмнэнии үлэлэр саҕаланнылар. СӨ Айылҕа харыстабылын миниистирин бастакы солбуйааччы Семен Яковлев салалталаах бөлөх Бүлүү куоракка тиийбитэ быданнаата. Сэтинньи 21 күнүгэр «Роскосмос» судаарыстыбаннай корпорация сирдээҕи космическай инфраструктураларга сүрүн исписэлииһэ Игорь Ляховенко, Бүлүү улууһун баһылыга Сергей Винокуров, баһылыгы солбуйааччы Андрей Лобашев уонна СӨ Айылҕа харыстабылын министиэристибэтин исписэлиистэрэ кыттыылаах мунньах буолла.
Игорь Ляховенко мунньах кыттыылаахтарыгар үлэ былаанын билиһиннэрдэ. Аракыата ыытыллыан иннинэ, чаастара түһэр сирин бөртөлүөтүнэн көтө сылдьан бэрэбиэркэлиир, тулалыыр айылҕа пробатын ылар уонна ол сиргэ сылдьар дьону сэрэтэр, эвакуациялыыр быһаарыы ылылынна. Маны сэргэ, Күбэйиндэ уонна Күүлэкээн олохтоохторун кытта көрсүһүү тэриллиэҕэ. Сэтинньи 22 күнүгэр үлэлиир малы-салы тиэйии түмүктэннэ. Бэлэмнэнии үлэҕэ өрөспүүбүлүкэтээҕи «Быыһыыр сулууспа» үлэһиттэрэ кыттыыны ыллылар.
Николай ПОПОВ, «Саха сирэ» хаһыат, edersaas.ru