Муус устар 13-14 күннэригэр Бүлүү улууһугар Социалистическай Үлэ Дьоруойа Семен Митрофанович Васильев төрөөбүтэ 100 сылыгар аналлаах дьаһаллар ыытылыннылар.
Надежда ЕГОРОВА, «Саха сирэ» хаһыат, edersaas.ru
Үөрүүлээх түгэн ыалдьыттара бастакы күн Чинэкэҕэ Семен Васильев аатынан орто оскуолаҕа муһуннулар. Онтон дьоруойдар сквердэригэр гирлянда уурдулар. Дьоруой төрөөбүт уонна олорбут сиригэр Эбэҕэ мемориальнай дуоска аһылынна. Мемориальнай дуоскаҕа алта бииргэ төрөөбүттэр ааттара киллэрилиннэ. Кинилэр өрөспүүбүлүкэ сайдыытыгар улахан кылааттарын киллэрбит үтүөлээх дьон. Бииргэ төрөөбүттэр ортолоругар ССРС потребкооперациятын туйгуна, РСФСР атыытын-эргиэнин үтүөлээх үлэһитэ, САССР үтүөлээх учуутала, САССР норуотун хаһаайыстыбатын үтүөлээх үлэһитэ уо.д.а. бааллар. Биир дьиэ кэргэҥҥэ маннык элбэх бочуоттаах наҕараадалардаах, үтүөлээх ааттаах ыал өрөспүүбүлүкэҕэ тарбахха баттанан эрдэҕэ.
Оскуолаҕа үөрэнээччилэри, кэлэктииби кытары көрсүһүү ураты истиҥник ыытылынна. Ол кэнниттэн «Кыталык» сынньалаҥ киинигэр дьоруойдарга, ол иһигэр, С.Васильевка анаммыт кэнсиэр буолла.
Бу күн өссө Семен Васильев туһунан саҥа кинигэ сүрэхтэннэ. «Васильев Семен Митрофанович» диэн кинигэни суруналыыстыка салаатыгар СӨ судаарыстыбаннай бириэмийэ лауреата, СӨ култуура үтүөлээх үлэһитэ, Бүлүү куорат уонна Чинэкэ бочуоттаах олохтооҕо Николай Крылов хомуйан оҥордо. «Кыталыкка» буолбут сүрэхтээһиҥҥэ элбэх киһи биир дьоруой олорон ааспыт кэмин, тус олоҕун туһунан истиҥник аҕынна, ааптарга махтанна.
Сарсыныгар Бүлүү куоракка Олоҥхо дьиэтигэр кинигэни сүрэхтээһиҥҥэ элбэх киһи кытынна. Ааптар Николай Крылов кэргэнинээн Анна Семеновналыын, Степанида Митрофановна уола Андрей Румянцев, Иннокентий Митрофанович кыргыттара Розалия, Екатерина, сиэнэ Жанна, уо.д.а. кэлбиттэрэ тэрээһини сэргэхситтэ. Олохтоохтор Семен Митрофанович удьуордарын астына көрдүлэр, истиҥник кэпсэттилэр, чугастыы билистилэр.
Николай Крыловы уонна кинигэ сүрэхтэниитин күндү ыалдьыттарын Бүлүү улууһун баһылыгын солбуйааччы Венера Тихонова, Бүлүүтээҕи педагогическай колледж дириэктэрэ Семен Иванов, Өкүндү баһылыга, дьоруой аймах-дьоно эҕэрдэлээтилэр. Мирнэй улууһун баһылыгын, «АЛРОСА» вице-президенин эҕэрдэ суруктарын аахтылар.
1934 с. – үлэтин биографията Гострудсберкасса систиэмэтигэр саҕаламмыта;
1944 г. – Дьокуускайга көһөн кэлэн, бэчээт уорганнарыгар үлэлээбитэ;
1945-1946 гг. –Кыһыл Аармыйа кэккэтигэр сулууспалаабыта, милитаристскай Японияны утары кыргыһыы кыттыылааҕа:
1946-1959 г. – «Кыым» хаһыат эрэдээксийэтин отделын сэбиэдиссэйэ;
1960 с. – «Мир» туруупка карьерыгар ЭКГ-4 экскаватор машиниһа;
1964 г. – экскаваторщиктар биригэдьиирдэрэ;
1964 с. тохсунньу 24 күнүгэр алмааһы хостуур промышленноһы тэрийиигэ ситиһиитин иһин, Социалистическай Үлэ Дьоруойун аата иҥэриллибитэ (Ленин уордьаннаах уонна «Серп и Молот» кыһыл көмүс мэтээллээх).
Надежда ЕГОРОВА, «Саха сирэ» хаһыат, edersaas.ru