Үгүс көрөөччү кутун туппут 5-с үбүлүөйдээх «Үрдэл» национальнай музыкальнай бириэмийэни туттарыы сиэрэ-туома кэлэр 2019 сыл тохсунньу 4 күнүгэр буолуоҕа. Билигин саха сиригэр, ырыа эйгэтигэр «Үрдэл» соҕотох национальнай бириэмийэ быһыытынан биллэр. Онон саха эстрадатыгар саҥа саҕалаан эрэр ырыаһыттар ааттарын оҥостоллоругар, айар аартыктара арылларыгар, ааттаах-суоллаах ырыаһыттар өссө даҕаны саҥаны айалларыгар-туталларыгар олук уонна күүс-көмө буолар.
«Үрдэл» устуоруйатыттан
«Үрдэл» устуоруйата 2014 сыллаахтан саҕаламмыта. Сахалыы ырыаны үйэтитэр, сайыннарар санааттан бастыҥ ырыа айааччыларын, музыкатын таҥан таһаарааччыларын, толорооччуларын бэлиэтиир уонна, биллэн турар, саҥа ааттары булан ылан киэҥ эйгэҕэ таһаарар сыаллаах ыытыллар.
Бу иннинээҕи сылларга «Үрдэл» бириэмийэҕэ финалга киирбит 15 толорооччу, ол иһигэр «Саха» НКИК быһаарыытынан уонна көрөөччүлэр, истээччилэр куоластааһыннарынан талыллыбыт икки кыайыылаах тиксэрэ.
Бастакы кыайыылаахтарынан ол саҕана эдэр ырыаһыттар Константин Степанов уонна Алексей Винокуров буолбуттара. Кинилэр билигин куоластарынан биллэр, саха эстрадатыгар тарбахха баттанар бастыҥ ырыаһыттар. Онтон «Үрдэл» түөрт статуэткатын хаһаайынынан Петр Кулаковскай буолар. Кини билигин да айар үлэ үөһүгэр сылдьар.
«Үрдэл-2018»
Бириэмийэ номинаннарын быһыытынан «Тэтим» араадьыйаҕа сыл устата истээччи кутун туппут бастыҥ толорооччулар киирэллэр. Быйыл сүүмэрдиир түһүмэххэ 48 бастыҥ ырыа кыттар, онтон финалга 24 ырыа ааһыаҕа. Уонна түмүгэр финалистартан 12 номинациянан кыайыылаахтар «Үрдэл» бириэмийэҕэ тиксиэхтэрэ.
Бу сыл балаҕан ыйыттан «Саха» НКИК күөх экраныгар уонна «Тэтим» араадьыйа музыкальнай ханаалыгар тэҥинэн быһа эпииргэ «Үрдэл» сүүмэрдиир биэриитэ саҕаламмыта. Биэриигэ күрэххэ кыттааччылар айар үлэлэрин, күрэххэ киирбит ырыаларын билиһиннэрэллэр. «Үрдэл» биэриини хас өрөбүл ахсын киэьэ 20:00ч «Саха» НКИК ханаалыгар көрүөххүтүн, Тэтим-саха араадьыйатыгар истиэххитин сөп. Куоластааһын быйыл Инстаграм биллэр социальнай ситимҥэ ыытыллар. Маныаха
@tetim_radio аккаунугар киирэн сөбүлүүр ырыаҕар, ырыаһыккар «сүрэх» туруоран куоластыахха сөп. «Үрдэл» национальнай музыкальнай бириэмийэни туттарыы үөрүүлээх сиэрэ-туома 2019 сыл тохсунньу 4 күнүгэр Суорун Омоллоон аатынан Опера уонна балет театрын
сыанатыгар ыытыллыаҕа. Кыайыылаахтар ааттарын бары онно билиэхпит.
Номинациялар:
Быйылгы үбүлүөйдээх сылга номинациялар бу курдуктар:
— «Бастыҥ ырыа»
— «Истээччилэр куоластааһыннарынан бастыҥ ырыа»
— «Бастын толорооччу»(эр дьонтон уонна дьахталлартан)
— «Бастыҥ үнкүүлэтэр тэтимнээх ырыа»
— «Сыл бастыҥ арыйыыта»
— «Бастыҥ тыыннаах бөлөх»
— «Бастыҥ ырыа тыллара»
— «Бастыҥ мелодия»
— «Бастыҥ аранжировка»
— «Бастыҥ клип»
— «Бастыҥ устуудьуйа»
«Үрдэл» биэриитин уонна кэнсиэрин саха сирин телевидениетын уонна араадьыйатын биллэр-көстөр ыытааччылара иилээн-саҕалаан ыыталлар. Быйылгы сүүмэрдиир биэриини Георгий Белоусов уонна Гея Буртахова ыыталлар. Бириэмийэн туттарыы кэнсиэрин Олег Колесов, Индира, Георгий Белоусов, Гея Буртахова, Лена Петрова, Ахтылҕан Петрович ыытыахтара.
«Үрдэл-2018» национальнай музыкальнай бириэмийэ генеральнай спонсорынан “Marseille” миэбэл мастарыскыайа буолар.
edersaas.ru