Үбүлүөйдээх ыаллары эҕэрдэлээтилэр

Бөлөххө киир:

Дьокуускайга Дьиэ кэргэн аан дойдутааҕы күнүгэр ЗАГС дьиэтигэр үөрүүлээх тэрээһин буолан ааста. Манна Бриллиантовай сыбаайбаларын бэлиэтээбит Матрена Прокопьевна, Иван Афанасьевич Семеновтары эҕэрдэлээтилэр. Кинилэр 60 сыл бииргэ иллээхтик-эйэлээхтик олорон, оҕо-сиэн бөҕөтүн улаатыннартаан, атахтарыгар туруортаан, ыал буолуу үтүө холобурун көрдөрөллөр.
Ангелина Васильева, “Саха сирэ” хаһыат, edersaas.ru

Ону тэҥэ, бу күн өрөспүүбүлүкэҕэ 4000-с киһинэн төрөөбүт кырачааны – Егор Залицкайы эҕэрдэлээн туран, кини төрөппүттэригэр өйдөбүнньүк сибидиэтэлистибэни туттардылар.

Кинилэри СӨ бырабыыталыстыбатын бэрэссэдээтэлин солбуйааччы Михаил Гуляев, “Арассыыйа ийэлэрэ” хамсааһын Саха сиринээҕи салаатын салайааччы Прасковья Борисова, Дьокуускай куорат баһылыгын солбуйааччы Евдокия Евсикова уонна аймах-билэ, чугас дьонноро, доҕотторо кэлэн эҕэрдэлээтилэр.
Элбэх оҕо төрүүрэ, тапталларын, истиҥ сыһыаннарын билиҥҥэ диэри харыстаан илдьэ кэлбит кырдьаҕас ыал элбиирэ, эдэрдэргэ холобур буолаллара – ити барыта олус үчүгэй. Маннык үөрүүлээх, үтүө бырааһынньыктар элбии турдуннар”, — диэн ЗАГС управлениетын салайааччы Светлана Филиппова бэлиэтээтэ.

Оттон Залицкайдар бу маннык тэрээһиҥҥэ ыҥырыллыахпыт диэн санаабатахтар, онон соһуйан эрэ хаалбыттар. Кинилэр үс оҕолоохтор: 8 саастаах Алина диэн кыыстаахтар, алталаах Ярослав диэн уоллаахтар. Оттон түөрт ыйдаах Егор кинилэргэ элбэх оҕолоох дьиэ кэргэн статуһун аҕалбыт. Онон өрөспүүбүлүкэттэн Ийэ хапытаалын, босхо учаастагы ылар уонна кэккэ чэпчэтиилэринэн туһанар кыахтаммыттар. Дьиэ кэргэн аан дойдутааҕы күнүн көрсө өрөспүүбүлүкэҕэ 4000 оҕо төрөөбүтэ бэлиэ түгэн.

Бу күн улуустарга эмиэ үөрүүлээх тэрээһиннэр буолуталаатылар. Холобур, Эдьигээн сэлиэнньэтэ бу күннэргэ тэриллибитэ 385 сылын бэлиэтээтэ. Ыам ыйын 15 күнүгэр “Үбүлүөйдээх Эдьигээн үбүлүөйдээх ыаллара” диэн тэрээһиҥҥэ 25, 30, 40, 45, 50 сыл бииргэ олорбут уон ыалы чиэстээтилэр.
Мендельсон маршынан доҕуһуоллатан, Кыһыл көмүс сыбаайбаларын бэлиэтээбит Ульяна Васильева, Еремей Елисеевич Ханчаевтар, Николай Иванович, Елизавета Михеевна Петровтар сценаҕа тахсан, үҥкүүлээн дайдылар. Кинилэри Эдьигээн улууһун үбүлүөйдээх дьиэ кэргэттэрин Бочуот кинигэтигэр киллэрдилэр, «Семейная доблесть» бэлиэни туттардылар. Онтон бииртэн биир сапфировай, рубиновай, чөмчүүк уонна үрүҥ көмүс сыбаайбаларын бэлиэтээбит дьиэ кэргэттэр тахсан, параадтаан, кэчигирэһэн истилэр.
Кинилэри улуус, нэһилиэк дьаһалтата, бииргэ үлэлиир кэлиэгэлэрэ, доҕотторо, аймахтара, оҕолоро-сиэннэрэ эҕэрдэлээтилэр, ырыа-тойук дьиэрэйдэ. Түмүккэ үбүлүөйдээх пааралар бары вальстаан эргичийбиттэрэ көрүөххэ кэрэ!..

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0