Муус устар 14 күнүгэр Дьокуускай дьаһалтатыгар Орджоникидзе болуоссатын аттыгар 12 этээстээх дьиэ тутуутугар уопсастыбаннай истии буолла. Чугастааҕы дьиэ олохтоохторо этэллэринэн, бырайыагы олоххо киллэриигэ көҥүл сокуоннайа суохтук бэриллибит. Салгыы, инвестор «ЯкутСтройСити» ХЭТ бэрэстэбитэлэ Гамлет Петросян борокоротуураҕа уонна Арбитражнай суукка үҥсэн, тутууну сөргүтэргэ көрдөспүт. Онуоха куорат дьаһалтата боппуруоһу уопсастыбаннай истиигэ таһаарбыт.
Айдааннаах истиигэ чугастааҕы дьиэ олохтоохторун итиэннэ дьыалаҕа чопчу сыһыаннаах дьонтон ураты, отучча эдэр уол кэлбит. news.ykt.ru сайт суруйарынан, уолаттар Петросян доҕоро Петр Петрову кытта Бүлүү улууһун землячествотын аатыттан кэлбиттэр. Элбэх этээстээх дьиэни тутууну өйөөн, Петров тыл этэн бүтээтин кытта, “Уруй-Айхал!” түһэрэллэр. Видео кытта баар. Бу матырыйаал анныгар элбэх киһи санаатын эппит — бүлүүлэри күтүрээбиттэр, ньулдьаҕай оҕолор өйдөрүн булкуйбут диэн Петровтаах Петросяны буруйдаабыттар.[vc_message message_box_color=»warning»]Бу дьыалаҕа “Бүлүү кэскилэ” уонна “Ситим” ыччат түмсүүтэ хоруйа маннык:
Орджоникидзе болуоссатын таhыгар тутуллуохтаах дьиэ тула общественнай истиилэр тустарынан news.ykt.ru саайтка ыстатыйа таҕыста. Ол онно Петр Николаевич Петров диэн киhи Бүлүү улууhун землячествотын аатыттан тыл эппит, эбиитин ыччаттары кытыннарбыт диэн суруллар. Манан сылтаан «Бүлүү кэскилэ» уопастыбаннай түмсүү официальнай хоруйу биэрэр: Биһиги ханнык даҕаны политическай, хаһаайыстыбаннай боппуруостарга орооспоппут. Ону таһынан, ыстатыйаҕа этиллибит Петр Петров “Бүлүү кэскилэ” түмсүүгэ туох да сыһыана суох. Мустубут ыччат араас улуустан сылдьар. Туох сыаллаах, тоҕо ити истиигэ кыттыбыттарын оҕолор бэйэлэрэ да билбэт буолуохтаахтар. Петр Петровка туһаайан этэбит: биһиги уопастыбаннай түмсүүбүт, улууспут аатыттан этинэргин тохтот, эдэр дьон өйүн булкуйума. Бүлүү землячествотыгар бу дьыалаҕа кыттыгастаах ыччаты кытта сөптөөх кэпсэтии тахсыаҕа. Өссө биирдэ этэбит, бүлүүлэр ити дьыалаҕа сыһыаммыт суох.
“Бүлүү кэскилэ” түмсүү уонна “Ситим” Бүлүү ыччатын түмсүүтэ.
[/vc_message]Sakhaday.ru сайтка Петр Петров маннык диир: “Доҕорбут өйөөн, билэр уолаттарбын аҕалбытымю Бүлүүлэр диэн сымыйанан суруйбуттар. Араас улуустан сылдьар таксист, атыыһыт, устудьуон уолаттар. Биллэн турар, харчы төлөөбөтөхпүт кинилэргэ. Мин тыл эппитим кэннэ “уруй-айхал” диэн хаһыытаарыҥ диэбитим”.
Уопсастыбаннай истии туһунан сиһилии бу ссылканан киирэн ааҕыҥ.