close
Бөлүүн хаар түспүт
· - Олох-дьаһах

Бөлүүн хаар түспүт

Бүгүн сарсыарда батсаап: «Бөлүүн Горнайга хаһыҥнаабыт. Дьааҥыга, Саккырыырга, Муомаҕа хаардаабыт», — диэн сонуннарынан уһугуннарда.

edersaas.ru

Бөлүүн Тымныы полюһугар Өймөкөөҥҥө хаардаабыт. Баччаларга хайаларга хаардыыр кэмэ.

Оттон батсаапка ахтыллыбыт Муомалартан туоһулаһан истибитим, Улахан Чыыстай нэһилиэгэр хаардаабыт үһү. Түүн -3-4 кыраадыс тымныйа сылдьыбыт.

Сорохтор хаар түспүт чааһын кытта «туочунайдаатылар»: сарсыарда 4 чаастан 9 чааска диэри. Олохтоохтор от ыйын ортотугар хаардыырыттан соһуйбаттар.

Ол курдук, Улахан Чыыстай нэһилиэгин олохтооҕо Егор Калугин:

Хоту сиргэ олоробут. Онон баччаларга хаар түһээччи. Оҕуруоппут салгыы үүнэр. Атырдьах ыйын бүтэһигэр үстүү куулга тиийэ хортуоппуйу хомуйабыт. Сиэмэ хортуоппуй кэмчи буолан, ыһар сирбит олох кыра. Бастаан сиирбитин хааччынабыт, — диэн кэпсиир.

Оттон Горнай улууһугар хаһыҥ түспүт. Улуустааҕы муниципалитет тэрийэр отделын салайааччыта Айталина Санникова иһитиннэрбитинэн, түүн -3 кыраадыска тиийэ тымныйбыт.

— Хортуоппуй, кабачок үлүйбүт. Дьон үксэ иһитиннэрии-биллэрии суоҕуттан, оҕуруоттарын саппатахтар, — диэн бэлиэтиир Горнай олохтооҕо.

Ыам ыйын 22 күнүгэр быйылгы сайыны билгэлииригэр Тускул:

— Сайын саҕаланар бастакы дэкээдэтин уонна ахсынньы, тохсунньу ыйдарга тэҥнээтэххэ, быйыл кыһын тыаллаах соҕус этэ. Онон бэс ыйын уонна от ыйын саҥаларыгар киин улуустарга хаһыҥныан сөп.  Оҕуруоттаах дьон түүҥҥү кэмҥэ олордууларгытын көрө уонна тэпилииссэҕитин  саба сылдьыҥ, — диэн сэрэтэн турар.

Бэҕэһээ тымныйыах чинчи биллэн, хаар-ардах салгына биллэр этэ. Мантан инньэ күһүн кэлэрэ биллэн иһиэҕэ. Онон, оҕуруотчуттар, күн-дьыл туругун истэ сылдьан,  үүнээйилэргитин бэрийэ, саба сылдьар кэмҥит үүннэ. 

Елена ПОТОЦКАЯ, «Саха сирэ» хаһыат, edersaas.ru

Хаартыска — батсааптан.

#бүгүн: 1
0
1

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

четыре − 2 =