Экологтар Иирэлээх, Оччугуй Ботуобуйа үрэхтэр, Бүлүү өрүс балыктарын, кыылларын чинчийэллэр. Чинчийиини өрөспүүбүлүкэтээҕи уонна Мииринэйдээҕи бэтэринээринэй-бэрэбиэркэлиир лабораториялар үлэһиттэрэ ыыттылар.
Мииринэй оройуонун бэтэринээринэй сулууспата балаҕан ыйын 10 күнүттэн алтынньы 15 күнүгэр диэри, икки күн буола-буола ууну, балыктары, тыа хаһаайыстыбатын кыылларын чинчийэр.
Холобур, “АЛРОСА” “Новай” сопхуоһун 2-с отделениетыгар 367 эдэр сүөһү баар. Бу субайдар ыанар ынах буолуохтаахтар. Бэтэринээрдэр үүт хаачыстыбатын эмиэ бэрэбиэркэлииллэр.
Чинчийии түмүгүнэн, сүөһүлэр туруктара үчүгэй. Маассабай ыалдьыы бэлиэтэммэтэх.
Ону тэҥэ, Сүлдьүкээр бөһүөлэгиттэн уонна балтараа көс тэйиччи сытар Тоҕойо диэн сиртэн балыктары тутан, микробиологическай, органолептическэй чинчийиилэри ыытыахтара, үөннэрин (паразиттарын) бэрэбиэркэлиэхтэрэ. Балык маассабай өлүүтэ суох.
Оччугуй Ботуобуйа үрэххэ өлө сытара булуллубут сыалыһары Дьокуускайга чинчийтэрэ ыыппыттара. Дьокуускайдааҕы бэтэринээринэй-бэрэбиэркэлиир лаборатория чинчийиитин түмүгүнэн, сыалыһарга буортулаах веществолар (кадмий, сибиньиэс), пестицидтэр, феноллар, формальдегидтэр нуорманы таһынан барыылара булуллубатах.
Сотору кэминэн Бүлүүнү уонна өрүс сүнньүнэн олорор нэһилиэнньэни кэтээн көрөр Кэлим чинчийэр эспэдииссийэ үлэлиэҕэ.
Ангелина ВАСИЛЬЕВА, «Саха сирэ» хаһыат, edersaas.ru