Бүлүү суола: Миирнэй уонна Таас Үрэх икки ардыгар баар учаастак аһылынна
Бүлүү федеральнай суолу өрөмүөннээһин, оҥоруу күүскэ барар. Сайын туттуммахтаан хаалбатахтарына, хаһан оҥоруохтарай? Өрөмүөн кэмигэр, буоларын курдук, тимир көлөлөөхтөр баралларыгар-кэлэллэригэр харгыс үөскүүр. edersaas.ru
Ону өйдөөн, төһө кыалларынан, үлэ ыыталла турар учаастактарыгар тимир көлөлөр харгыһа суох сылдьалларыгар усулуобуйаны оҥоро сатыыллар. Ол курдук, Бүлүү суолун 1255-с км 1275 км диэри ыытылла турар учаастакка (20 км уһуннаах) улахан массыыналар тоҕута түһэн алдьаппыт кэрчиктэригэр, эбии буору аҕалан кутан, билигин Миирнэй куорат уонна Таас Үрэх сэлиэнньэтин икки ардыгар сырыы баар буолла.
Гаврил Матвеев, «Бүлүү» суола управлениетын пресс-сулууспатын үлэһитэ:
– Таас Үрэх сэлиэнньэтин аттыгар оҥоһулла турар учаастакка ыарахан уйуктаах тимир көлөлөр суолу тоҕута түһэн алдьатан, от ыйын саҥатын эргин дьоҕус массыыналар айанныылларыгар ыарахаттар үөскээбиттэрэ. Билигин ол туоратылынна. Ити 20 км уһуннаах учаастак өрөмүөнэ, былаан быһыытынан, быйыл алтынньыга үмүрүтүллүөҕэ.